উন্মোচিত হ’ল ভাৰতীয় অৰ্থনীতিৰ অন্য অধ্যায়: ৰাষ্ট্ৰীয়কৃত বেংকে হ্ৰাস কৰি আনিছে কৰ্মচাৰীৰ সংখ্যা

ডিজিটেল ডেস্ক: সংকটে ছানি ধৰিছে ভাৰতীয় অৰ্থনীতি৷ টকাৰ মূল্য হ্ৰাস, জিএছটিৰ অৱনমনে দেশৰ অৰ্থনীতিক কোঙা কৰি তোলাৰ সময়তে আহিছে ইটোৰ পিছত সিটো উদ্বেগজনক খবৰ৷ জিএছটি প্ৰৱৰ্তন, আকস্মিক বিমুদ্ৰাকৰণে দেশৰ অৰ্থনীতিলৈ বৃহৎ প্ৰত্যাহ্বান কঢ়িয়াই অনা বুলি মত ব্যক্ত কৰিছিল দেশৰ প্ৰখ্যাত অৰ্থনীতিবিদসকলে৷

আনকি, দেশৰ বিধ্বস্ত অৰ্থনৈতিক অৱস্থাৰ বাবেই পদত্যাগ পৰ্যন্ত কৰিবলগীয়া হৈছিল ৰিজাৰ্ভ বেংক  অব ইণ্ডিয়াৰ গৱৰ্ণৰে৷ নবেলজয়ী অৰ্থনীতিবিদ অভিজিৎ বেনাৰ্জীয়ে ইতিমধ্যে কেইবাবাৰো কেন্দ্ৰীয় চৰকাৰক দেশৰ অৰ্থনীতি পুনৰুদ্ধাৰৰ পৰামৰ্শ দি আহিছে৷ কিন্তু, এইক্ষেত্ৰত কেন্দ্ৰীয় চৰকাৰে কোনো কাণসাৰ দিয়া পৰিলক্ষিত হোৱা নাই৷ বিধ্বস্ত অৰ্থনীতিৰ প্ৰতি পিঠি দি ধৰ্ম‌, ভাষা জাতীয় সংবেদনশীল বিষয়ৰ অৱতাৰণাৰে জনসাধাৰণক ব্যস্ত কৰি ৰখাৰ মৃদু কৌশল অৱলম্বন কৰাহে পৰিলক্ষিত হয়৷ আৰু মৌলিক বিষয়ৰ অৱতাৰণা নকৰাকৈ স্থূল বিষয়েৰে ঢাকি ৰখা হয় ভগ্ন অৰ্থনীতিৰ কংকালসাৰ জঁকা৷

আৰু শেহতীয়াকৈ প্ৰকাশ পাইছে দেশৰ ভগ্ন অৰ্থনীতিৰ আন এক ভয়ংকৰ ছবি৷ বিধ্বস্ত অৰ্থনীতিৰ বাবেই দেশৰ পাঁচটাকৈ ৰাষ্ট্ৰীয়কৃত বেংকে হ্ৰাস কৰিবলগীয়া হৈছে কৰ্মচাৰীৰ সংখ্যা৷ বিগত পাঁচ বছৰত পাঁচটা ৰাষ্ট্ৰীয়কৃত বেংকে হ্ৰাস কৰি আনিছে কৰ্মচাৰীৰ সংখ্যা৷ আৰু ক্ৰমশ: লোকচানৰ মুখলৈ গতি কৰিছে দেশৰ ৰাষ্ট্ৰীয়কৃত বেংক প্ৰতিষ্ঠানসমূহ৷ ৰাষ্ট্ৰীয় সংবাদ প্ৰতিষ্ঠান দৈনিক ভাস্কৰে প্ৰকাশ কৰিছে চাঞ্চল্যকৰ তথ্য৷

শেহতীয়া তথ্য অনুসৰি, পাঁচ বছৰত ভাৰতীয় ষ্টেট বেংকৰ  কৰ্মচাৰী সংখ্যা হ্ৰাস পালে ১৯,৭৯১জন৷ ২০১৮ বৰ্ষত ২,৬৪,০৪১জন কৰ্মচাৰী থকা বেংকটোৰ ২০২২ বৰ্ষত কৰ্মচাৰীৰ সংখ্যা ২,৪৪,২৫০জন৷ অৱশ্যে পঞ্জাব নেশ্যনেল বেংকৰ কৰ্মচাৰীৰ সংখ্যা বৃদ্ধি পাইছে পাঁচ বছৰত৷ ১,৩৪২জন কৰ্মচাৰী বৃদ্ধি পাইছে পঞ্জাব নেশ্যনেল বেংকত৷ আনহাতে, কানাড়া বেংকত ২০১৮ বৰ্ষত কৰ্মচাৰীৰ সংখ্যা আছিল ৮৮,২১৩জন৷ বেংকটোৰ কৰ্মচাৰীৰ সংখ্যা ১,২৯৪জন হ্ৰাস হৈ ২০২২বৰ্ষত হয়গৈ ৮৬,৯১৯জন৷

একেদৰে, বেংক অব্ বৰোদাৰ কৰ্মচাৰীৰ সংখ্যা হ্ৰাস হৈ পাঁচ বছৰত হৈছেগৈ ৭৯,৮০৬জন৷ পূৰ্বে ২০১৮ চনত আছিল ৮২,৮৮৬জন৷ পাঁচ বছৰত ৩,০৮০জন কৰ্মচাৰী হ্ৰাস পালে বেংকটোৰ৷ একেদৰে, ইউনিয়ন বেংক অব্ ইণ্ডিয়াৰ ৩,০০১জন কৰ্মচাৰী হ্ৰাস পালে পাঁচ বছৰত৷ ২০১৮ চনত ৭৮,২০২জন কৰ্মচাৰী থকা বেংকটোৰ ২০২২ বৰ্ষত কৰ্মচাৰীৰ সংখ্যা হ’লগৈ ৭৫,২০১জন৷

সদ্যপ্ৰকাশিত এই তথ্যই উন্মোচিত কৰিলে সাম্প্ৰতিক ভাৰতীয় অৰ্থনীতিৰ আন এটি অন্ধকাৰ দিশ৷ এনে পৰিস্থিতিত দেশৰ অৰ্থনীতি পুনৰুদ্ধাৰৰ বাবে বাস্তৱসন্মত আৰু বিজ্ঞানসন্মত কাৰ্যকৰী ব্যৱস্থা গ্ৰহণ নকৰিলে যে অনাগত দিনত ভাৰতবৰ্ষই ভয়াৱহ সংকটৰ গ্ৰাসত পৰিব সেয়া ধূৰুপ৷