ডিজিটেল ডেস্কঃ বিমানৰ ভিতৰতে ওলাল এডাল সাপ! উৰন্ত বিমানৰ ভিতৰতে সাপডাল দেখাৰ পিছতে যাত্ৰীসকলৰ মাজত হুৱা-দুৱা লাগে। ঘটনাটো ঘটিছে ইউনাইটেড এয়াৰলাইনছৰ এখন বিমানত। ইউনাইটেড এয়াৰলাইনছৰ বিমান খনে ফ্লৰিডাৰ পৰা নিউ জাৰ্চিলৈ যাত্ৰা কৰি থকাৰ সময়তে হঠাতে এগৰাকী যাত্ৰী বিমানৰ ভিতৰত এডাল প্ৰকাণ্ড সাপ দেখিবলৈ পায়।
লগে লগে কথাটো সকলো যাত্ৰীৰ মাজত বিয়পি পৰে। ইপিনে সাপডালে যেনি-তেনি গতি কৰিবলৈ লোৱাত যাত্ৰীসকল শংকিত হৈ পৰে।
সাপটো দেখা পোৱাৰ পিছত বিমানৰ ব্যৱসায়িক শ্ৰেণীৰ যাত্ৰীসকলে চিঞৰিবলৈ আৰম্ভ কৰিছিল। যাত্ৰীসকলে নিজৰ আসনৰ ওপৰত ভৰি তুলি কোনো মতে কুচিমুচি বহি আছিল।। পিছত সাপডাল বিমানবন্দৰৰ কৰ্তৃপক্ষই ধৰি কাষৰে বনাঞ্চলত এৰি দিয়ে। এই ঘটনাই বহুতকে চেমুৱেল এল জেকচন অভিনীত ২০০৬ চনৰ কাল্ট ছবি স্নেকছ অন এ প্লেনৰ কথা মনত পেলাই দিছিল।
চলচ্চিত্ৰখনত বিমানৰ ভিতৰত ডজন ডজন বিষাক্ত সাপে যাত্ৰীৰ চাৰিওফালে ঘূৰি আছিল। এনেদৰে সাপ মেলি দুৰ্বৃত্তই এজন বিশেষ লোকক হত্যা কৰিবলৈ চেষ্টা কৰিছিল। সাপডালে কেনেকৈ বা কেতিয়া বিমানখনত সোমাল সেয়া এতিয়াও স্পষ্ট হোৱা নাই।
সৌভাগ্যৰ কথাটো এয়াই যে সাপডালে কোনো যাত্ৰীৰেই ক্ষতি কৰা নাই। নিউ জাৰ্চিৰ বিমানবন্দৰত বিমান খনে অৱতৰণ কৰাৰ পিছতহে যেন যাত্ৰীসকলে উশাহ ঘূৰাই পায়।
উল্লেখ্য চলিত বৰ্ষৰ ফেব্ৰুৱাৰী মাহত মালয়েছিয়াৰ কুৱালালামপুৰৰ পৰা তাৱাউলৈ যোৱা এয়াৰএছিয়াৰ এখন বিমানৰ ভিতৰতো এডাল সাপ ওলাইছিল।
Continue Reading
