ডিজিটেল ডেস্কঃ মাজ আকাশতে এখন বিমানত চাৰিজন যাত্ৰীৰ মাজত কাজিয়াৰ সূত্ৰপাত হয়। যুদ্ধক্ষেত্ৰ হৈ পৰে বিমানৰ অন্তৰ্ভাগ। যাত্ৰীকেইজনৰ মাজত হোৱা কাজিয়াৰ বাবে বিমানখনেও জৰুৰীকালীন অৱতৰণ কৰিবলগীয়া হয়। ঘটনাটো সন্দৰ্ভত অষ্ট্ৰেলিয়ান ফেডাৰেল পুলিচে (এ এফ পি) আটক কৰে চাৰিজন যাত্ৰীক। সংবাদ মাধ্যমৰ খবৰ অনুসৰি অষ্ট্ৰেলিয়াৰ কুইন্সলেণ্ডৰ কেয়াৰ্নছৰ পৰা দেশৰ উত্তৰ অঞ্চললৈ গৈ আছিল বিমানখন।
এ এফ পিৰ এজন বিষয়াই জনোৱা মতে, ২০ এপ্ৰিলত কেয়াৰ্নছৰ পৰা গ্ৰুট দ্বীপলৈ যোৱা এখন বিমানত এই ঘটনা সংঘটিত হৈছিল। চাৰিজন যাত্ৰীৰ মাজত কাজিয়া তীব্ৰতৰ হৈ পৰাত পাইলটে বিমানখন জৰুৰীকালীন অৱতৰণ কৰিবলৈ বাধ্য হয়।
বিমানখনৰ ভিতৰত চাৰিজন যাত্ৰীৰ সংঘৰ্ষৰ ভিডিঅ’ ইতিমধ্যে ছ’চিয়েল মিডিয়াত ভাইৰেল হৈ পৰিছে। অৱশ্যে প্ৰাগ ডিজিটেলে এই ভিডিঅ'টোৰ সত্যতা পৰীক্ষা কৰা নাই। ছ’চিয়েল মিডিয়াত ভাইৰেল হোৱা ভিডিঅ’টোত দেখা গৈছে যে এদল যাত্ৰীয়ে নিজৰ আসন এৰি বিমানখনৰ ভিতৰত থিয় হৈ আছে। এগৰাকী মহিলা যাত্ৰীয়ে এটা মদৰ বটলেৰে সহযাত্ৰী এজনক প্ৰহাৰ কৰিছে৷
ইয়াৰ পিছত বাকী যাত্ৰীসকলে পাইলটজনক কুইন্সলেণ্ডলৈ উভতি যাবলৈ অনুৰোধ জনায়। আৰক্ষীয়ে জনোৱা মতে, কুইন্সলেণ্ডত বিমানখন অৱতৰণ কৰাৰ পিছতে মহিলা যাত্ৰীগৰাকীক গ্ৰেপ্তাৰ কৰা হয়।
কিন্তু ইয়াৰ পিছতেো বিমানখনত অশান্তিৰ সৃষ্টি হয়। পুনৰ যাত্ৰীসকলৰ মাজত কাজিয়া আৰম্ভ হয়৷ বিমানখনৰ এখন খিৰিকীও ভাঙি যায়। গ্ৰুট দ্বীপৰ আলিয়াংগুলাত বিমানখন অৱতৰণ কৰাৰ পিছতে আৰক্ষীয়ে তিনিজন যাত্ৰীক গ্ৰেপ্তাৰ কৰে।
আৰক্ষীয়ে জনোৱা মতে, ধৃত আটাইকেইজনেই মদ্যপান কৰি আছিল আৰু সেইবাবেই অশান্তিৰ সৃষ্টি হৈছিল৷
Continue Reading
