ডিজিটেল ডেস্কঃ সাম্প্ৰদায়িক উগ্ৰতাই দেশত লাভ কৰিছে এক চূড়ান্ত ৰূপ৷পুনৰ তেনে এক খবৰ আহিছে দিল্লীৰ পৰা৷ দেওবাৰে (২০ আগষ্ট) দিল্লীৰ জিটিবি এনক্লেভ থানাৰ বাহিৰত বজৰংগ দল, ৰাষ্ট্ৰীয় স্বয়ংসেৱক সংঘ আৰু বিশ্ব হিন্দু পৰিষদৰ শতাধিক লোক সমবেত হৈ ‘জয় শ্ৰী ৰাম’ ধ্বনি দিয়ে। ইয়াৰ কাৰণ হ’ল থানাৰ ভিতৰত খ্ৰীষ্টান সম্প্ৰদায়ৰ লোকসকলে এই সংগঠনসমূহৰ বিৰুদ্ধে এফআইআৰ ৰুজু কৰিবলৈ চেষ্টা চলাইছিল।
এইসকল লোকে উপাসনা কৰাৰ সময়ত বজৰং দলৰ সদস্যই লাঠিৰে আক্ৰমণ কৰাৰ অভিযোগ উত্থাপন কৰিছে। নাম প্ৰকাশ কৰিবলৈ অনিচ্ছুক এজন মানুহে কয় যে, 'প্ৰতি দেওবাৰে যেতিয়া আমাক গীৰ্জাত প্ৰাৰ্থনা কৰিবলৈ লৈ যোৱা হয়, তেতিয়া আমি ভয়ত জীয়াই থাকোঁ৷'
জানিব পৰা মতে দেওবাৰে পুৱা প্ৰায় ১০.৩০-১১ বজাত লফে তাহিৰপুৰ অঞ্চলৰ জিয়ন প্ৰাৰ্থনা গৃহত সকলোৱে প্ৰাৰ্থনা কৰি আছিল, হঠাতে স্পীকাৰ লৈ কিছুমান মানুহ অট্টালিকাটোত প্ৰৱেশ কৰে আৰু ‘হিন্দু ৰাষ্ট্ৰ বানায়েংগে, জয় শ্ৰী ৰাম’ ধ্বনি দিয়া হয়।
খ্ৰীষ্টান ধৰ্মৰ কেইবাজনো লোকে নিশ্চিত কৰিছে যে অট্টালিকাটোত প্ৰৱেশ কৰা লোকসকলে তৰোৱাল আৰু লাঠিৰে সজ্জিত হৈ বাইবেল ফালিছিল।নিজৰ পৰিচয় প্ৰকাশৰ পৰা বিৰত থকা তিনিগৰাকী মহিলাই দাবী কৰিছে যে তেওঁলোকক বজৰং দলৰ পুৰুষে প্ৰহাৰ কৰাৰ লগতে তেওঁলোকৰ কাপোৰ খুলিবলৈ চেষ্টা চলাইছিল।
উল্লেখযোগ্য যে ইউনাইটেড খ্ৰীষ্টান ফ’ৰাম (UCF)-এ প্ৰকাশ কৰা এক প্ৰতিবেদনত দেখা গৈছে যে ২০১৪ চনৰ পৰা খ্ৰীষ্টানসকলৰ ওপৰত আক্ৰমণ যথেষ্ট বৃদ্ধি পাইছে।তেওঁলোকৰ প্ৰতিবেদন অনুসৰি ২০১৪ চনত গীৰ্জাঘৰত ১৪৭টা আক্ৰমণ সংঘটিত হৈছিল আৰু এই সংখ্যা প্ৰায় প্ৰতি বছৰে বৃদ্ধি পাই আহিছে। ছিয়াছাট ডেইলীৰ বাতৰি অনুসৰি যোৱা বছৰ খ্ৰীষ্টানসকলৰ বিৰুদ্ধে ৫৯৯টা আক্ৰমণ আৰু ২০২৩ চনৰ প্ৰথম ১৯০ দিনত সম্প্ৰদায়টোৰ ওপৰত ৪০০টা আক্ৰমণ সংঘটিত হৈছে।
ইউচিএফৰ প্রতিবেদনত ২০২৩ চনত ২৩খন ৰাজ্যত খ্ৰীষ্টানসকলৰ বিৰুদ্ধে হিংসাত্মক ঘটনা সংঘটিত হোৱা বুলিও প্রকাশ কৰা হৈছে, উত্তৰ প্রদেশে ১৫৫টা কাণ্ড সংঘটিত কৰি আগবাঢ়ি আছে, তাৰ পাছতে ছত্তীশগড়ত এনেধৰণৰ ৮৪টা কাণ্ড সংঘটিত হৈছে৷
Continue Reading
