ডিজিটেল ডেস্কঃ ভুৱা বাতৰি প্ৰকাশ কৰাৰ অভিযোগত সুদৰ্শন নিউজ চেনেলৰ সাংবাদিকৰ বিৰুদ্ধে ব্যৱস্থা গ্ৰহণ কৰি এতিয়া চৰকাৰৰ ৰোষত পৰিছে এগৰাকী শীৰ্ষ আৰক্ষী বিষয়া৷ হাৰিয়ানাৰ চৰকাৰে গুৰুগ্ৰামৰ আৰক্ষী আয়ুক্ত কালা ৰামচন্দ্ৰনক বদলি কৰিছে৷
আৰক্ষী বিষয়াগৰাকীয়ে সুদৰ্শন নিউজৰ ভুৱা বাতৰি প্ৰকাশ কৰা সাংবাদিক মুকেশ কুমাৰৰ বিৰুদ্ধে ব্যৱস্থা গ্ৰহণ কৰিছিল। ভুৱা বাতৰি প্ৰচাৰ কৰা এজন সাংবাদিকক গ্ৰেপ্তাৰ কৰা আৰক্ষী আয়ুক্তজনৰ বদলিৰ ঘটনাটোৱে এতিয়া ছ'চিয়েল মিডিয়াত ব্যাপক প্ৰতিক্ৰিয়াৰ সৃষ্টি কৰিছে৷
হাৰিয়ানাত মেৱাটত হোৱা সাম্প্ৰদায়িক হিংসাৰ পিছত দুগৰাকী আৰক্ষী বিষয়াই পৰিস্থিতি নিয়ন্ত্ৰণত ৰাখিবলৈ চেষ্টা কৰিছিল। গুৰগাঁৱৰ আৰক্ষী আয়ুক্ত কালা ৰামচন্দ্ৰনে সুদৰ্শন চেনেলক ভুৱা বাতৰি প্ৰচাৰ কৰাত বাধা দিছিল। প্ৰতিক্ৰিয়াশীল চক্ৰৰ বিৰুদ্ধে কঠোৰ হোৱা আই.পি.এছ. প্ৰভাকৰ চৌধুৰীৰ সৈতেও একেধৰণৰ ঘটনা ঘটিছে৷
এই গৰাকী আৰক্ষী বিষয়াই বৰেলীত মাতাল কানৱাৰিয়াসকলক নিয়ন্ত্ৰণ কৰিবলৈ লাঠিচালনা কৰিছিল। সেয়াই তেওঁৰ বাবে যেন অপৰাধ হ’ল৷ এইগৰাকী বিষয়াকো বদলিৰ নিৰ্দেশ দিয়া বুলি জানিব পৰা গৈছে৷ যেতিয়াই বিষয়াসকলে সততাৰে কাম কৰিব বিচাৰে তেতিয়াই বিভিন্ন পক্ষই তেওঁলোকক শাস্তি দিবলৈ আৰম্ভ কৰে বুলি ছ’চিয়েল মিডিয়াত ব্যাপক আলোচনা হৈছে৷
Continue Reading
