উত্তৰ প্ৰদেশত এতিয়া চলিছে ভঙা-গঢ়া; বিজেপিলৈ সমাজবাদী নেতা, প্ৰিয়ংকাৰ পোষ্টাৰ গাৰ্লেও এৰিলে দল

ডিজিটেল ডেস্ক : বিধানসভা নিৰ্বাচনৰ দিন চমু চপাৰ লগে লগে উত্তৰ প্ৰদেশত তীব্ৰ হৈ পৰিছে ভঙা-পতাৰ খেল। প্ৰথমে অখিলেশ যাদৱৰ সমাজবাদী পাৰ্টীয়ে বিজেপিত ভাঙোন সৃষ্টি কৰাৰ পাছত এইবাৰ বিজেপিয়ে তেওঁলোকৰ খেল দেখুৱাবলৈ আৰম্ভ কৰিছে। বিজেপিয়ে অখিলেশ যাদৱৰ ঘৰতেই প্ৰথমে আঘাত হনাটোৱে স্নায়ু যুঁজখনত বিজেপিৰ অগ্ৰগতিকে যেন সূচাইছে। উল্লেখ্য যে, বুধবাৰে অখিলেশ যাদৱৰ ভাইবোৱাৰী অৰ্থাত মুলায়ম সিং যাদৱৰ বোৱাৰী অপৰ্না যাদৱে যোগ দিছিল বিজেপিত। এই ধাৰাবাহিকতা অব্যাহত আছে। এইবাৰ মুলায়ম সিং যাদৱৰ আন এজন আত্মীয় তথা সমাজবাদী পাৰ্টীৰ প্ৰাক্তন বিধায়ক প্ৰমোদ গুপ্তা আৰু কংগ্ৰেছ নেত্ৰী প্ৰিয়ংকা মৌৰ্যই যোগ দিছে বিজেপিত। অখিলেশ-মুলায়মৰ ঘৰতে পোনপটীয়াকৈ আক্ৰমণ চলাই বিজেপিয়ে যেন তেওঁলোকৰ মনোভাব স্পষ্ট কৰি দিছে। উত্তৰ প্ৰদেশ বিধানসভা নিৰ্বাচনৰ প্ৰস্তুতিত কংগ্ৰেছে বৰ বিশেষ প্ৰভাৱ বিস্তাৰ কৰিবলৈ সক্ষম হোৱা নাই। প্ৰিয়ংকা গান্ধীৰ নেতৃত্বত কংগ্ৰেছে ‘লড়কী হু লড় ছকতী হুঁ’ কেম্পেইন আৰম্ভ কৰিছে যদিও তাৰ প্ৰভাৱ বৰ পৰিলক্ষিত হোৱা নাই। কিয়নো বৃহস্পতিবাৰে বিজেপিত যোগ দিয়া প্ৰিয়ংকা মৌৰ্য আছিল প্ৰিয়ংকা গান্ধীৰ ‘লড়কী হু লড় ছকতী হুঁ’ কেম্পেইনৰ পোষ্টাৰ গাৰ্ল। অৰ্থাত কংগ্ৰেছে যি মূল থীম লৈ এই নিৰ্বাচনত অৱতীৰ্ণ হোৱাৰ কথা ভাবিছিল সেয়া কলিতে ব্যৰ্থ হৈছে। আৰু এতিয়া যুঁজ চলিছে কেৱল বিজেপি আৰু সমাজবাদী পাৰ্টীৰ মাজত। বিজেপিয়ে সমাজবাদী পাৰ্টীৰ পৰা নেতাক ভাঙি নিজৰ দললৈ অনাৰ চেষ্টা কৰিছে আৰু অখিলেশ-মুলায়মৰ ঘৰলতেই প্ৰথমে হাত দিছে। কিন্তু এইসকল নেতাৰ ৰাজনৈতিক প্ৰভাৱ কি সেয়া লক্ষ্যণীয় বিষয়। ইফালে কিন্তু বিজেপি এৰি অহা তিনিগৰাকী মন্ত্ৰী তথা প্ৰায় এক ডজন বিধায়কে বিজেপিক অতি অস্বস্তিত পেলোৱাটো স্পষ্ট হৈ পৰিছে।