ভাল দিন আহি আছে বাংলাদেশ ক্ৰিকেট দললৈ! পাকিস্তানক হৰুৱাবলৈ বদ্ধপৰিকৰ বাংলাদেশঃ শ্ৰীধৰণ শ্ৰীৰাম

ডিজিটেল ডেস্কঃ ভাল দিন আহি আছে বাংলাদেশ ক্ৰিকেট দললৈ। সেই ভাল দিনটোলৈ আৰু বেছি দূৰ নাই!- এই মন্তব্য কৰিছে বাংলাদেশ ক্ৰিকেট দলৰ এগৰাকী পৰামৰ্শদাতা শ্ৰীধৰণ শ্ৰীৰামে।

দেওবাৰে টি২০ বিশ্বকাপত পাকিস্তানৰ বিৰুদ্ধে অৱতীৰ্ণ হ’ব বাংলাদেশ। এডিলেইডত খেলিব লগা মেচখনত পাকিস্তানক পৰাভূত কৰি চেমি ফাইনেলত প্ৰৱেশ কৰাৰ আশা ৰাখিছে ছাকিব-আল-হাছান নেতৃত্বাধীন দলটোৱে।

দলটোৱে শেহতীয়াকৈ ভাৰতৰ বিৰুদ্ধে অৱতীৰ্ণ হৈছিল আৰু শ্বাহৰুদ্ধকৰ মেচখনত মাত্ৰ ৫ ৰাণৰ ব্যৱধানত পৰাজীত হৈছিল। এইদৰে পৰাজীত হোৱাৰ পাছত দলটোৱে পৰৱৰ্তী মেচখনৰ বাবে শিক্ষা লাভ কৰা বুলি পৰামৰ্শদাতা শ্ৰীধৰণ শ্ৰীৰামে কয়।

উল্লেখ্য যে ছেমিফাইনেলৰ পথ এতিয়াও বন্ধ হোৱা নাই বাংলাদেশৰ। পাকিস্তানক হৰুৱাব পাৰিলেই ছেমিফাইনেলৰ বাবে দৰ্জা মুকলি হ’ব দলটোৰ।

“পাকিস্তান অত্যন্ত ভাল দল। পাকিস্তানে যিদৰে আমাৰ শক্তি আৰু দুৰ্বলতাৰ বিষয়ে জানে, সেইদৰে আমিও পাকিস্তানৰ শক্তি আৰু দুৰ্বলতাৰ বিষয়ে জানো।”- শ্ৰীধৰণ শ্ৰীৰামে কয়।

“ভাৰতৰ বিৰুদ্ধে আমি যুঁজি যুঁজি হাৰিছো। দলৰ খেলুৱৈসকলে আত্মবিশ্বাস লাভ কৰিছে। ভাৰতৰ দৰে এটা দলক আমি প্ৰত্যাহ্বান জনাব পাৰিছো। অনুভৱ হৈছে যে বাংলাদেশ ক্ৰিকেটৰ ভাল দিন সমাগত।”- তেওঁ কয়।