ডিজিটেল ডেস্ক: ২০২৩ বৰ্ষই মেলানি মাগিবলৈ আৰু মাত্ৰ কেইটিমান পলক বাকী৷ আগমন ঘটিব আন এটি আশাব্যঞ্জক নতুন বৰ্ষৰ৷
বিদায় ল’বলগীয়া ২০২৩ বৰ্ষত দেশৰ ভূমিত সংঘটিত হৈছিল বহু উল্লেখনীয় ঘটনা-পৰিঘটনা৷ ২০২৩ বৰ্ষৰ জানুৱাৰী মাহত WFIৰ প্ৰাক্তন সভাপতি ব্ৰীজভূষণৰ যৌন নিৰ্যাতনৰ অভিযোগত দিল্লীৰ ৰাজপথ উত্তাল হৈছিল দেশৰ তাৰকা মল্লযোদ্ধাৰ প্ৰতিবাদত৷
আনহাতে বিদায়ী বৰ্ষটোৰ ফেব্ৰুৱাৰী মাহত আবকাৰী কেলেংকাৰিৰ অভিযোগত EDএ গ্ৰেপ্তাৰ কৰিছিল দিল্লীৰ উপ-মুখ্যমন্ত্ৰী মনীষ ছিছ’দিয়াক৷ ২০২৩ৰ মাৰ্চ মাহটো আছিল ঘটনাবহুল৷ মোদী উপাধি গোচৰত দোষী সাব্যস্ত হৈ সাংসদ পদ হেৰুৱাইছিল কংগ্ৰেছ নেতা ৰাহুল গান্ধীয়ে৷ তাৰ বিপৰীতে সুদূৰ আমেৰিকাত অস্কাৰৰ মঞ্চত জিলিকিছিল বোলছবি RRR৷ নাট্টো নাট্টোৱে আঁজুৰি আনিবলৈ সক্ষম হৈছিল অস্কাৰ৷
এপ্ৰিলত চীনক চেৰাই বিশ্বৰ জনবহুল ৰাষ্ট্রত পৰিণত হৈছিল ভাৰতবৰ্ষ৷ আনহাতে খালিস্তানী আন্দোলনত পুনৰবাৰ উত্তাল হৈছিল পঞ্জাৱ৷ গ্ৰেপ্তাৰ হৈছিল খালিস্তানী নেতা অমৃত পাল সিং৷ ২০২৩ বৰ্ষৰ মে’ মাহত মণিপুৰত সূত্ৰপাত হৈছিল গোষ্ঠীগত সংঘাত৷ য’ত এতিয়ালৈ প্ৰাণ হেৰুৱাইছে প্ৰায় ২০০ গৰাকী লোকে৷
আনহাতে ভাৰতৰ নতুন সংসদ ভৱন উদ্বোধন হোৱা ২০২৩ৰ মে’ মাহতে কৰ্ণাটকৰ নিৰ্বাচনত কংগ্ৰেছৰ বৃহৎ সফলতা৷ আনহাতে ওডিশাৰ বালাছ’ৰত সংঘটিত ভয়ংকৰ ৰে’ল দুৰ্ঘটনাই কঁপাই গৈছে ২০২৩ বৰ্ষৰ জুন মাহ৷ দেশৰ ৰাজনীতিত পৰিৱৰ্তনৰ ধাৰা অব্যাহত ৰাখি ২০২৩ৰ জুলাইত শাসনাধিষ্ঠ NDAৰ বিৰুদ্ধে একত্ৰিত বিৰোধীয়ে গঠন কৰিছিল INDIA মৰ্চা৷
আনহাতে বিদায়ী বৰ্ষটোৰ আগষ্টত চন্দ্ৰৰ দক্ষিণ মেৰুত সফল অৱতৰণেৰে ইতিহাস ৰচনা চন্দ্ৰযানৰ৷ ছেপ্তেম্বৰত নতুন দিল্লীত G-20 শীৰ্ষ সন্মিলন আয়োজন ভাৰতৰ৷ তাৰ বিপৰীতে খালিস্তানী প্ৰসংগত কানাডাৰে সম্পৰ্ক বিঘ্নিত ভাৰতৰ৷ সমলিংগ বিবাহৰ নায্যতাক খাৰিজ কৰি অক্টোবৰত উচ্চতম ন্যায়ালয়ৰ গুৰুত্বপূৰ্ণ ৰায়দান৷
আনহাতে নৱেম্বৰ মাহত ভাৰতত এদিনীয়া বিশ্বকাপ প্ৰতিযোগিতাৰ উন্মাদনাৰ বিপৰীতে উত্তৰ কাশীৰ ছিলকিয়াৰা সুৰংগত আবদ্ধ হৈছিল ৪১গৰাকী শ্ৰমিক৷ ২০২৩ বৰ্ষৰ ডিচেম্বৰত ৩ ৰাজ্যত বিজেপিৰ নিৰ্বাচনী জয়ৰ বিপৰীতে সংসদত দুৰ্বৃত্তৰ প্ৰৱেশৰ প্ৰসংগত ১৪৩ বিৰোধী সাংসদক নিলম্বনৰ এক নজিৰবিহীন ঘটনাৰ সাক্ষী হৈ ৰ’ল দেশবাসী৷
Continue Reading
