ডিজিটেল ডেস্কঃ প্ৰথম দৃষ্টিত তেনেই সাধাৰণ যেন লগা এখন ছবি। কিন্তু সেই ছবি খনৰেই নিলাম মূল্য উঠিল ৬১.৮ কোটি টকা। এক কথাত ক’বলৈ গ’লে ভাৰতীয় মহিলা চিত্ৰশিল্পীৰ চিত্ৰই বিশ্বত অভিলেখ গঢ়িলে। অবিশ্বাস্য যেন লাগিলেও সেই ছবি খন এতিয়া ৬১.৮ কোটি টকাত নিলাম হৈছে। ইয়াৰ পূৰ্বে কেতিয়াও ভাৰতীয় চিত্ৰ ইমান উচ্চ মূল্যত বিক্ৰী হোৱা নাছিল।
প্ৰয়াত শিখ-হাংগেৰিয়ান শিল্পী অমৃতা শ্বেৰগিলে অঁকা ছবি 'দ্য ষ্টৰী টেলাৰ' শেহতীয়াকৈ এই অভিলেখ মূল্যত বিক্ৰী হৈছে। ১৯৩৭ চনৰ ছবি খন বিশ্ব মঞ্চত নিলাম কৰা হৈছিল। উল্লেখ্য এই মাহৰ আৰম্ভণিতে চৈয়দ হায়দৰ ৰাজাৰ 'জেষ্টেচন' শীৰ্ষক পেইণ্টিং খন ৫১,৭০ কোটি টকাত বিক্ৰী হৈছিল। ইয়াৰ ১০ দিনতকৈও কম সময়ৰ ভিতৰত অমৃতা শ্বেৰগিলৰ ছবি খনে এটা নতুন অভিলেখ স্থাপন কৰিলে।
'দ্য ষ্টৰী টেলাৰ' পেইণ্টিং খনৰ নিলাম মূল্য ৬১.৮০ কোটি টকালৈ বৃদ্ধি পোৱাৰ কথাই বহুতকে আচৰিত কৰি তুলিছে। এই নিলাম দিল্লীত অনুষ্ঠিত হৈছে। পেইণ্টিংখনৰ ক্ৰেতাৰ নাম এতিয়াও ৰাজহুৱা কৰা হোৱা নাই। নিলাম অনুষ্ঠিত কৰা কোম্পানীটোৰ মুখ্য কাৰ্যবাহী বিষয়াই কয় "এয়া অমৃতা শ্বেৰগিলৰ সৰ্বশ্ৰেষ্ঠ কামবোৰৰ ভিতৰৰে এটা । তেওঁ ছবিৰ নিলামৰ পৃথিৱীত এক অনন্য দৃষ্টান্ত স্থাপন কৰিছে"।
উল্লেখ্য ১৯৪১ চনতে অমৃতা শ্বেৰগিলৰ মৃত্যু হৈছিল । ভাৰতীয় মহিলা শিল্পীসকলৰ মাজত তাইৰ নাম বিশেষভাৱে উল্লেখযোগ্য। ২০০৬ চনত তেওঁৰ 'ভিলেজ গ্ৰুপ' ছবি খনো ৬.৯ কোটি টকাত বিক্ৰী হৈছিল। সেই সময়ত ছবি খনৰ নিলাম মূল্যই অভিলেখ গঢ়িছিল।
Continue Reading
