ডিজিটেল ডেস্কঃ ‘পাপ্পু’ৰ পৰা ‘শ্বেহজাদে’লৈকে বহুকেইটা উপহাসমূলক নামেৰে বছৰ বছৰ ধৰি বিজেপিৰ প্ৰধান লক্ষ্য হৈ আহিছে কংগ্ৰেছ নেতা ৰাহুল গান্ধী। বিগত দশকত প্ৰতিটো নিৰ্বাচনতে এয়া দেখা গৈছিল। কিন্তু এই লোকসভা নিৰ্বাচনত কংগ্ৰেছৰ আসনৰ সংখ্যাৰ বঢ়াৰ লগে লগে ৰাহুল গান্ধীক লৈ বিশেষ চৰ্চা চলিছে৷ এটা দশকৰ ভিতৰত এয়া দলটোৰ সৰ্বশ্ৰেষ্ঠ প্ৰদৰ্শন৷
গান্ধীয়ে কাৰ্যতঃ ভাৰত জোডো যাত্ৰাৰ জৰিয়তে নিজৰ অভিযান আৰম্ভ কৰিছিল। এই সময়ছোৱাত গান্ধী দেশৰ জনতাৰ মাজলৈ সোমাই গৈছিল৷ ইয়াৰ ভিডিঅ’সমূহ ভাইৰেল হৈ পৰিছিল৷
আনহাতে, প্ৰিয়ংকা গান্ধীৰ কথা ক’বলৈ গ’লে এইবাৰ নিৰ্বাচনত প্ৰতিদ্বন্দ্বিতা কৰিব বুলি বহুতে আশা কৰিছিল৷ প্ৰতিদ্বন্দ্বিতা নকৰাত বিভিন্ন প্ৰশ্ন উত্থাপন হৈছিল। কেইবাটাও সাক্ষাৎকাৰত কৈছিল যে এইটো এটা সচেতন সিদ্ধান্ত আছিল। যদি তেওঁ আৰু ৰাহুল দুয়োজনেই নিৰ্বাচনত প্ৰতিদ্বন্দ্বিতা কৰে তেন্তে তেওঁলোকে মাত্ৰ এটা সমষ্টিত প্ৰচাৰৰ সৈতে বান্ধ খাই পৰিব বুলি উল্লেখ কৰিছিল৷
ৰাহুল গান্ধীয়ে সমগ্ৰ দেশ ভ্ৰমণ কৰাৰ সময়তে প্ৰিয়ংকাই পৰিয়ালৰ দুৰ্গ আমেথি আৰু ৰায়েবাৰেলীত কংগ্ৰেছৰ প্ৰচাৰ অভিযানৰ নেতৃত্ব দিয়াৰ দায়িত্ব গ্ৰহণ কৰে। গান্ধী পৰিয়ালৰ আনুগত্যশীল কিশোৰী লাল শৰ্মাই কেন্দ্ৰীয় মন্ত্ৰী স্মৃতি ইৰাণীক পৰাস্ত কৰি এক বিশেষ জায়েণ্ট কীলাৰ হিচাপে আত্মপ্ৰকাশ কৰিছে৷ ইয়াৰ দ্বাৰা ২০১৯ চনৰ ৰাহুল গান্ধীৰ পৰাজয়ৰ মধুৰ প্ৰতিশোধ লোৱা হৈছে৷
Continue Reading
