ডিজিটেল ডেস্কঃ প্ৰধানমন্ত্ৰী নৰেন্দ্ৰ মোদীয়ে বুধবাৰে কয় যে ভাৰতত পেটেন্ট আবেদনৰ বৃদ্ধিয়ে যুৱ-সমাজৰ বৰ্ধিত উদ্ভাৱনীমূলক আগ্ৰহৰ সাক্ষ্য বহন কৰিছে আৰু আগন্তুক সময়ৰ বাবে এয়া অতিশয় ইতিবাচক লক্ষণ।
বিশ্ব বৌদ্ধিক সম্পদ সংস্থা (World Intellectual Property Organization)ৰ প্ৰতিবেদন সন্দৰ্ভত এইদৰে কয়। এই প্ৰতিবেদনত প্ৰকাশ পোৱা অনুসৰি, ২০২২ত ভাৰতীয়সকলৰ পেটেন্ট আবেদনৰ হাৰ ৩১.৬ শতাংশ বৃদ্ধি পাইছে। এই বৃদ্ধিৰ হাৰ ১১ বছৰে শীৰ্ষ ১০ আবেদনকাৰী দেশৰ ভিতৰত সৰ্বাধিক।
২০২২ত বৈশ্বিক পেটেন্টিং কাৰ্য্য-কলাপে নতুন অভিলেখ ৰচনা কৰে। ইয়াত ভাৰতীয় আৰু চীনৰ উদ্ভাৱকসসকলে ইন্ধন যোগায় তথা এই দেশসমূহৰ বৰ্ধিত উদ্ভাৱন, উদ্যমিতা আৰু ডিজিটেলাইজেচনে চালিকাশক্তিৰ ভূমিকা পালন কৰে।
প্ৰতিবেদনখনত ভাৰতৰ বৃদ্ধিৰ কথা উল্লেখেৰে প্ৰকাশ যে চীনৰ উদ্ভাৱসকলে সমগ্ৰ বিশ্বৰ মুঠ পেটেন্ট আবেদনৰ প্ৰায় আধা সংখ্যক দাখিল কৰি অহাৰ বিপৰীতে দেশখনৰ এই বৃদ্ধিৰ হাৰ ২০০১ত ৬.৮ শতাংশৰপৰা ২০২২ত ৩.১ শতাংশলৈ একেৰাহে দ্বিতীয় বৰ্ষৰ বাবে হ্ৰাসহে পায়।
প্ৰধানমন্ত্ৰী মোদীয়ে এক্সত কয়, "ভাৰতত পেটেন্ট আবেদনৰ বৃদ্ধিয়ে যুৱ-সমাজৰ বৰ্ধিত উদ্ভাৱনীমূলক আগ্ৰহৰ সাক্ষ্য বহন কৰিছে আৰু আগন্তুক সময়ৰ বাবে এয়া অতিশয় ইতিবাচক লক্ষণ।"
প্ৰতিবেদনখনে তদুপৰি কয় যে পোন-প্ৰথমবাৰৰ বাবে ভাৰতীয়সকলে বিদেশী আবেদনকাৰীসকলৰ তুলনাত অধিক পেটেন্ট দাখিল কৰিছে। এই বৰ্ধনে দেশখনৰ দ্ৰুত-বৰ্ধমান উদ্ভাৱন বাতাবৰণকে সূচিত কৰিছে।
ইয়াতকৈয়ো গুৰুত্বপূৰ্ণ কথা এয়ে যে ভাৰতত ৰেচিডেন্ট পেটেন্ট ফাইলিং (ভাৰতীয় পেটেন্ট কাৰ্য্যালয়ৰ জৰিয়তে দাখিল কৰা) ২০২২ত ৪৭% বৃদ্ধিৰে ৩৮,৫৫১লৈ বৃদ্ধি পাইছে।
২০২২ত সমগ্ৰ বিশ্বৰ উদ্ভাৱকসকলে ৩.৫ নিযুত পেটেন্ট আবেদন দাখিল কৰে আৰু এই পৰিসংখ্যাই একেৰাহে তৃতীয় বৰ্ষৰ বাবে বৃদ্ধিক সূচিত কৰিছে। সামগ্ৰিকভাৱে, ২০২২ত সৰ্বাধিক সংখ্যক পেটেন্ট দাখিল কৰা দেশসমূহ হৈছে চীন, যুক্তৰাষ্ট্ৰ, জাপান, কোৰিয়া গণৰাজ্য আৰু জাৰ্মানী।
Continue Reading
