ডিজিটেল ডেস্ক; বিশ্ব স্বাস্থ্য সংস্থাৰ এক অধ্যয়নত পোহৰলৈ আহিছে উদ্বেগজনক তথ্য৷ ভাৰতত প্ৰতিবছৰে এক লক্ষাধিক লোকে কৰে আত্মহত্যা৷ জ্যেষ্ঠ মনোৰোগ বিশেষজ্ঞ ডাঃ পৱন ৰাঠীয়ে ক্ৰিয়েট ষ্ট’ৰীজ নামৰ এটা বেচৰকাৰী সংস্থাৰ দ্বাৰা আয়োজিত ‘বিশ্ব আত্মহত্যা প্ৰতিৰোধ দিৱস’ শীৰ্ষক এখন আলোচনাচক্ৰত ভাষণ প্ৰদান কৰি এই তথ্য সদৰী কৰে৷
শুকুৰবাৰে এক যোগ কেন্দ্ৰত যুৱক-যুৱতী আৰু অভিভাৱকৰ সমাৱেশক সম্বোধন কৰি ডাঃ ৰাঠীয়ে কয়, বিশ্ব আত্মহত্যা প্ৰতিৰোধ দিৱস ১০ ছেপ্টেম্বৰত পালন কৰা হয়৷ বিশ্ব স্বাস্থ্য সংস্থাৰ মতে ভাৰতত প্ৰতি বছৰে প্ৰায় ১ লাখ লোকে আত্মহত্যা কৰে।
তেওঁ লগতে কয় যে প্ৰতিটো ছেকেণ্ডত পৃথিৱীত কোনোবাই আত্মহত্যা কৰিবলৈ চেষ্টা কৰে। ‘এনে কিয় হয়, যেতিয়া মানুহে এই মানসিক অৱস্থাত উপনীত হয় আৰু ভাবে যে এতিয়া জীৱনত একো বাকী নাই তেতিয়াই আত্মহত্যাৰ চিন্তা উদ্ভৱ হয়’- এই ব্যাখ্যা ডাঃ ৰাঠীৰ৷
তেওঁ লগতে কয় যে বিশ্ব স্বাস্থ্য সংস্থাৰ প্ৰতিবেদনত উল্লেখ কৰা অনুসৰি আত্মহত্যা কৰা লোকসকলৰ বেছিভাগেই ১৫-২৯ বছৰ বয়সৰ লোক৷ ইয়াৰ পৰা অনুমান কৰিব পাৰি যে আত্মহত্যা কৰা সকলৰ বেছিভাগেই কিশোৰ আৰু যুৱক-যুৱতী৷
লগতে এইটো লক্ষ্য কৰা হৈছে যে এই বয়সত অধ্যয়নৰ চাপ আৰু নিবনুৱা সমস্যা হৈছে আত্মহত্যাৰ মুখ্য কাৰণ। অৱশ্যে ৮০ শতাংশ ক্ষেত্ৰত সহায়ৰ দ্বাৰা আত্মহত্যা প্ৰতিৰোধ কৰিব পাৰি বুলিও ডাঃ ৰাঠীয়ে উল্লেখ কৰে৷
তেওঁ লগতে কয় যে গৱেষণাই দেখুৱাইছে যে আত্মহত্যা প্ৰতিৰোধ কৰাৰ সৰ্বশ্ৰেষ্ঠ উপায় হৈছে ইয়াৰ লক্ষণ, হতাশা আৰু বিকাৰৰ লক্ষণবোৰ চিনাক্ত কৰা, যাতে ব্যক্তিজনক সময়মতে চিকিৎসা কৰিব পৰা যায়।
Continue Reading
