ডিজিটেল ডেস্কঃ মোদী চৰকাৰৰ বিৰুদ্ধে সৰৱ হৈ পৰিছে টুইটাৰৰ সহ-প্ৰতিষ্ঠাপক তথা প্ৰাক্তন মুখ্য কাৰ্যবাহী বিষয়া জেক ডৰ্চি। ডৰ্চিয়ে দাবী কৰে যে কৃষকৰ আন্দোলনৰ সময়ত চৰকাৰৰ বিৰোধিতা কৰা একাউণ্ট বন্ধ কৰিবলৈ ভাৰতে ‘হেঁচা’ দিছিল।
কেন্দ্ৰীয় মন্ত্ৰী ৰাজীৱ চন্দ্ৰশেখৰে এতিয়া তেওঁৰ এই দাবীৰ প্ৰত্যুত্তৰ দিছে। তেওঁ কয় যে ডৰ্চিয়ে সম্পূৰ্ণ মিছা কথা কৈছে। টুইটাৰে বাৰে বাৰে ভাৰতীয় আইন উলংঘা কৰি আহিছে।
কেন্দ্ৰীয় মন্ত্ৰীগৰাকীয়ে কয়, “এয়া জেক ডৰ্চিয়ে কোৱা এটা গোকাট মিছা। টুইটাৰে বাৰে বাৰে আৰু ধাৰাবাহিকভাৱে ভাৰতীয় আইন উলংঘা কৰিছিল। ২০২০ চনৰ পৰা ২০২২ চনলৈকে বাৰে বাৰে আইন উলংঘা কৰিছিল আৰু অৱশেষত ২০২২ চনৰ জুন মাহত তেওঁলোকে মানি লৈছিল। কোনো জে’ললৈ যোৱা নাছিল, নাইবা টুইটাৰ ‘বন্ধ’ হোৱা নাছিল।”
টুইটাৰৰ সহ-প্ৰতিষ্ঠাপক জেক ডৰ্চিয়ে এক সাক্ষাৎকাৰৰ সময়ত দাবী কৰিছিল যে ভাৰত চৰকাৰে তেওঁক কৃষকৰ আন্দোলন সামৰি লোৱা একাউণ্টবোৰ ব্লক কৰিবলৈ হেঁচা প্ৰয়োগ কৰিছিল। চৰকাৰৰ বিৰোধিতা কৰি থকা এনে একাউণ্ট বন্ধ কৰিবলৈ কোৱা হৈছিল। কেৱল এয়াই নহয়, ভাৰতত টুইটাৰ বন্ধ কৰাৰ ভাবুকিও আহিছিল।
টুইটাৰৰ প্ৰাক্তন মুখ্য কাৰ্যবাহী বিষয়াগৰাকীয়ে লগতে কয় যে কৃষকৰ আন্দোলন সন্দৰ্ভত চৰকাৰক সমালোচনা কৰা এনে সাংবাদিকৰ একাউণ্টো বন্ধ কৰিবলৈ ভাৰত চৰকাৰে অনুৰোধ জনাইছিল। এইটো দেখি মোৰ এনে লাগিছিল যে যদি টুইটাৰে এই কাম নকৰে তেন্তে ইয়াক ভাৰতত বন্ধ কৰি দিয়া হ’ব আৰু ভাৰতত ইয়াৰ কৰ্মচাৰীৰ ঘৰত অভিযান চলোৱা হ’ব।
ডৰ্চিয়ে কয় যে তুৰস্কতো ভাৰতৰ দৰেই সমস্যাৰ সন্মুখীন হৈছিল। তাত থকা চৰকাৰেও টুইটাৰ বন্ধ কৰাৰ হুংকাৰ দিছিল।
Continue Reading
