ডিজিটেল ডেস্কঃ ভাৰততো হ’ব পাৰে ইজৰাইলৰ দৰেই আক্ৰমণ! এই আশংকা ব্যক্ত কৰিছে প্ৰতিৰক্ষা মন্ত্ৰী ৰাজনাথ সিঙে। এনে আশংকা ব্যক্ত কৰি সিঙে ভাৰতীয় সেনাক স্পষ্ট বাৰ্তা দিছে যে তেওঁলোকে হঠাতে হ’ব পৰা এনে আক্ৰমণৰ বাবে সাজু থাকিব লাগিব। ইজৰাইলৰ ওপৰত হামাছৰ আক্ৰমণৰ পিছতে এই সিঙে এনে বাৰ্তা দিছে। সন্ত্ৰাসবাদী গোট হামাছে সংঘটিত কৰাৰ দৰেই ভাৰততো আক্ৰমণ হ'ব পাৰে বুলি ইতিমধ্যে চোৰাংচোৱাইয়ো আশংকা কৰিছে। সেনাই সীমান্ত অঞ্চলত সন্ত্ৰাসবাদীৰ অনুপ্ৰৱেশ প্ৰতিহত কৰিবলৈ অস্ত্ৰ-শস্ত্ৰ মজুত কৰিছে।
৭ অক্টোবৰত হামাছে ইজৰাইলৰ ওপৰত আকস্মিক আক্ৰমণ চলাইছিল। সূত্ৰ অনুসৰি, এই আক্ৰমণৰ বিষয়ে ভাৰতৰ কেইবাটাও সশস্ত্ৰ সেৱাৰ মুৰব্বী, চোৰাংচোৱা সংস্থা আৰু বৈদেশিক পৰিক্ৰমা মন্ত্ৰালয়ৰ বিষয়াসকলে আলোচনা কৰিছে। তাৰ পিছতে প্ৰতিৰক্ষা মন্ত্ৰী সিঙে সেনালৈ এই বিশেষ বাৰ্তা প্ৰেৰণ কৰিছে। ৰাজনাথ সিঙে কৈছে যে আনকি আটাইতকৈ অপ্ৰত্যাশিত আক্ৰমণটোৰ বাবেও প্ৰস্তুত থকা উচিত।
ভাৰতে ইতিমধ্যে কেইবা হাজাৰ কোটি টকা ব্যয়েৰে ড্ৰোনকে ধৰি কেইবাবিধো অস্ত্ৰ ক্ৰয় কৰিছে। ভাৰতে কাশ্মীৰ সীমান্তৰ লগতে জলপথতো সন্ত্ৰাসবাদীৰ অনুপ্ৰৱেশ বন্ধ কৰিবলৈ চেষ্টা কৰি আছে। এইক্ষেত্ৰত নৌসেনাই শক্তিশালী পদক্ষেপ গ্ৰহণ কৰিছে। ইয়াৰ উপৰি পাকিস্তান অধিকৃত কাশ্মীৰৰ পৰা সন্ত্ৰাসবাদীৰ অনুপ্ৰৱেশ প্ৰতিহত কৰিবলৈ সেনাই কঠোৰ সতৰ্কতা অৱলম্বন কৰিছে। দৰাচলতে, হামাছে হঠাতে সীমান্তৰ সিপাৰৰ পৰা ইজৰাইলক আক্ৰমণ কৰিছিল। সেনাই ভাৰতৰ সীমাৰ সিপাৰ পৰাও একে ধৰণৰ আক্ৰমণ হ’ব পাৰে বুলি এতিয়া সতৰ্ক হৈ পৰিছে।
ভাৰতে ইজৰাইল-হামাছৰ সংঘৰ্ষৰ ওপৰত চকু ৰাখিছে। কূটনীতিবিদসকলে কৈছে যে এই বিবাদ সহজে শেষ নহ’ব। ইজৰাইলে হামাছক সম্পূৰ্ণৰূপে ধ্বংস কৰিলেহে বিবাদৰ অন্ত পৰিব। আনহাতে ভাৰতে আশংকা কৰিছে যে ইৰাণেও যুদ্ধত যোগদান কৰিব পাৰে। অৱশ্যে, ভাৰতে হামাছৰ আক্ৰমণৰ পৰা শিকিব বিচাৰিছে আৰু এই ক্ষেত্ৰত সতৰ্ক হ'ব বিচাৰিছে।
Continue Reading
