ভগৱান শ্ৰীৰামচন্দ্ৰৰ স’তে ৰাহুল গান্ধীৰ সংযোগ বিচাৰি পালে মহাৰাষ্ট্ৰ কংগ্ৰেছৰ মুৰব্বী নানা পাটলেই

ডিজিটেল ডেস্কঃ এইবাৰ ৰাম আৰু ৰাহুল গান্ধীৰ মাজত সাদৃশ্যতা বিচাৰি পাইছে কংগ্ৰেছ নেতাসকলে। শেহতীয়াকৈ দুজনকৈ দেশৰ জ্যেষ্ঠ কংগ্ৰেছ নেতাই এই সম্পৰ্কত লক্ষ্যণীয় মন্তব্য আগবঢ়াইছে।

মহাৰাষ্ট্ৰ কংগ্ৰেছৰ সচিব নানা পাটলেই কয় যে ৰাহুল গান্ধী আৰু ৰামৰ মাজত এটা কাকতালীয় সংযোগ আছে। সেয়া হৈছে দুয়োগৰাকীৰে নামটো আৰম্ভ হৈছে ৰ আখৰেৰে।

পাটলেৰ পূৰ্বে সোমাবাৰে ৰাজস্থানৰ মন্ত্ৰী পাৰচাদী লাল মীনাইও একে মন্তব্য কৰিছিল। তেওঁ কৈছিল যে ৰামে অযোধ্যাৰ পৰা লংকালৈ যিদৰে যাত্ৰা কৰিছিল, সেইদৰে ৰাহুল গান্ধীয়েও ‘ভাৰত জোড়ো যাত্ৰা’ কৰিছে। আনকি ৰামতকৈও বেছি দূৰত্ব ৰাহুল গান্ধীয়ে অতিক্ৰম কৰিছে।

“ৰাহুল গান্ধীৰ পদযাত্ৰা ঐতিহাসিক।”- মীনাই কৈছিল। মীনাৰ বক্তব্যটোৱে চৰ্চা লাভ কৰি থাকোতেই ইয়াৰ সমৰ্থনত নানা পাটলেই কয় যে ৰাহুল গান্ধী আৰু ৰামৰ প্ৰথম আখৰৰ মাজত সাদৃশ্য আছে কিন্তু কংগ্ৰছ দলে তেওঁলোকৰ মাজত তুলনা কৰা নাই।

 “এয়া ভগৱান শ্ৰীৰামচন্দ্ৰৰ লগত তুলনা নহয় কিন্তু এটা কাকতালীয় সংযোগ যে ৰাহুল গান্ধী আৰু ৰাম- দুয়োগৰাকীৰে প্ৰথম আখৰটো ৰ।”- পাটলেই কয়।

“ভগৱান ভগৱানেই আৰু ৰাহুল গান্ধী এজন মানুহ। ৰাহুল গান্ধীয়ে মানৱতাৰ বাবে কাম কৰি আছে।”- তেওঁ যোগ দিয়ে।

উল্লেখ্য যে ৰাহুল গান্ধীৰ নেতৃত্বত ‘ভাৰত জোড়ো যাত্ৰা’ই মঙলবাৰে পুৱা অন্ধ্ৰ প্ৰদেশত সোমাইছে। বৰ্তমানলৈকে যাত্ৰাটোৰ ৪১ টা দিন অতিক্ৰম কৰিছে। কংগ্ৰেছে টুইটাৰযোগে কয় যে অন্ধ্ৰ প্ৰদেশত ৰাহুল গান্ধী সোমোৱাৰ লগে লগে ৰাজ্যখনত ব্যাপক উচাহ পৰিলক্ষিত হৈছে।