ডিজিটেল ডেস্কঃ অৰবিন্দ কেজৰিৱালৰ মুখতো শুনা গ’ল জয় শ্ৰীৰাম ধ্বনি। শনিবাৰে গুজৰাটৰ বদোদৰাত নিজৰ দল আম আদমী পাৰ্টিৰ ‘ত্ৰিৰংগা ৰেলী’ত অংশ লৈ দিল্লীৰ মুখ্যমন্ত্ৰীজনে ‘জয় শ্ৰীৰাম’ ধ্বনি দিয়ে।
কেৱল ধ্বনি দিয়াই নহয়, বিজেপিৰ বিৰুদ্ধেও সমালোচনাত মুখৰ হৈ পৰিল কেজৰিৱাল। কয় যে বিজেপিয়ে তেওঁৰ বিৰুদ্ধে মিছা কথা কৈ আহিছে। কিন্তু এইবোৰলৈ তেওঁ ভ্ৰুক্ষেপ নকৰে।
বিজেপিয়ে দেশত ঘৃণাৰ প্ৰচাৰ কৰি অহা বুলি কৈ কেজৰিৱালে অভিযোগ কৰে যে দলটোৱে আনকি ভগৱানকো তুচ্ছ-তাচ্ছিল্য কৰিছে। আনহাতে, জয়শ্ৰীৰাম আৰু জয়শ্ৰীকৃষ্ণ ধ্বনি দি তেওঁ নিজকে ভগৱানৰ পৰম ভক্ত বুলিও অভিহিত কৰে।
“মই এজন হনুমানভক্ত। আৰু বিজেপিৰ নেতাসকল কংসৰ সতি-সন্ততি। মই জন্মাষ্টমীত জন্মগ্ৰহণ কৰিছিলো। ভগৱানে মোক এক বিশেষ উদ্দেশ্যৰ বাবে পৃথিৱীলৈ প্ৰেৰণ কৰিছিল। সেই উদ্দেশ্য যে কংসৰ এই সতি-সন্ততিসকলৰ বিনাশ আৰু দুৰ্নীতিকাৰীক নিৰ্মূল কৰা।”- কেজৰিৱালে কয়।
উল্লেখযোগ্য যে গুজৰাটৰ বিধানসভা নিৰ্বাচনলৈ লক্ষ্য ৰাখি সম্প্ৰতি আম আদমী পাৰ্টিয়ে তীব্ৰ প্ৰচাৰকাৰ্য অব্যাহত ৰাখিছে। সেই উদ্দেশ্যেৰে কেজৰিৱালে দুদিনৰ বাবে গুজৰাটত বাহৰ পাতি আছে।
Continue Reading
