ডিজিটেল ডেস্কঃ হে ভগৱান! ভগৱানকো প্ৰতাৰণা। এজন ভক্তই মন্দিৰৰ দান বাকচত দি থৈ গল ১০০ কোটি টকাৰ এখন চেক। মন্দিৰৰ কৰ্মীসকলে যেতিয়া দানৰ বাকচটো খুলিলে, তেতিয়া তেওঁলোকে এই চেকখন পাইছিল। এই চেকখন লৈ বেংকলৈ যোৱাৰ পাছত দেখা গল যে সেই লোকজনে স্বয়ং ভগৱানকে প্ৰতাৰণা কৰিলে।
জানিব পৰা মতে, দান বাকচত ১০০ কোটি টকাৰ চেক জমা দিয়া ব্যক্তিজনৰ বেংক একাউণ্টত মাত্ৰ ১৭ টকাহে আছিল। এই ঘটনা অন্ধ্ৰ প্ৰদেশৰ শ্ৰী বাৰহলক্ষ্মী নৰসিংহ স্বামী মন্দিৰত সংঘটিত হৈছে।
মন্দিৰ কৰ্তৃপক্ষই যেতিয়া চেকখন সংশ্লিষ্ট বেংকলৈ প্ৰেৰণ কৰে, তেতিয়া তেওঁলোকে ভুৱা ভক্তজনৰ একাউণ্টত মাত্ৰ ১৭ টকাহে থকা দেখি হতভম্ব হৈ পৰে।
ছ’চিয়েল মিডিয়াত ভাইৰেল হৈ পৰে চেকখনৰ ছবি। চেকখনত স্বাক্ষৰ কৰে বোদ্দেপল্লী ৰাধাকৃষ্ণই। ৰাধাকৃষ্ণই চেকখনত তাৰিখ লিখা নাই আৰু চেকখন কোটক মহিন্দ্ৰা বেংকৰ। চেকত প্ৰকাশ পাইছে যে ভুৱা ভক্তজন বিশাখাপট্টনমৰ বেংকৰ এটা শাখাৰ একাউণ্ট হোল্ডাৰ।
যদি দাতাৰ উদ্দেশ্য আছিল মন্দিৰ কৰ্তৃপক্ষক প্ৰতাৰণা কৰা, তেন্তে বেংকক তেওঁৰ বিৰুদ্ধে চেক বাউন্স গোচৰ আৰম্ভ কৰিবলৈ অনুৰোধ কৰা হ’ব পাৰে। ভুৱা ভক্তৰ এই কাৰ্যক লৈ বহু লোকেই ছ’চিয়েল মিডিয়াত বিভিন্ন ধৰণৰ মন্তব্য কৰে।
উল্লেখ্য যে বিশাখাপট্টনমৰ সিমহাচলাম পাহাৰত অৱস্থিত শ্ৰী বাৰহলক্ষ্মী নৰসিংহ স্বামী মন্দিৰ অন্ধ্ৰ প্ৰদেশৰ অন্যতম বিখ্যাত মন্দিৰ।
Continue Reading
