ডিজিটেল ডেস্ক: শাওন মাহ মানেই হিন্দু ধৰ্মাৱলম্বী লোকসকলৰ উপাস্য দেৱতা মহাদেৱ শিৱৰ আৰাধনাৰ কাল। পৰম্পৰাগতভাৱে চলি অহা হিন্দু সকলৰ ধৰ্মবিশ্বাস অনুসৰি শাওন মাহৰ প্ৰথমটো সোমবাৰে মহাদেৱ শিৱৰ পূজা কৰা হয়। শিৱৰ আৰাধনাৰ বাবে শিৱভক্ত সকলে ভিৰ কৰে মহাদেৱ শিৱৰ উপাসনাস্থলীসমূহত।
এই উদ্দেশ্যৰেই সোমবাৰে বিহাৰৰ চিৱানস্থিত বাবা মহেন্দ্ৰ নাথ মন্দিৰত সমাগম হৈছিল অসংখ্য ভক্তৰ। ভক্তৰে ভৰি পৰিছিল মন্দিৰ চৌহদ। কিন্তু ভক্তৰ এই অফুৰন্ত ভক্তিয়েই কাল হৈ পৰিল দুগৰাকী মহিলাৰ বাবে।
মন্দিৰ চৌহদত এনে বিশাল ভিৰৰ বাবে এক অস্থিৰ পৰিৱেশৰ সৃষ্টি হয় আৰু ভক্তৰ ঠেলা-হেঁচাত পদপিষ্ট হৈ মৃত্যুক সাবটি লয় দুগৰাকী মহিলাই। আনহাতে ঠেলা-হেঁচাত মাটিত বাগৰি পৰা আন দুগৰাকী মহিলাও গুৰুতৰভাৱে আঘাতপ্ৰাপ্ত হয়।
আঘাতপ্ৰাপ্ত মহিলাসকলক তাৎক্ষণিকভাৱে স্থানীয় এখন চিকিৎসালয়লৈ লৈ যোৱা হয়। অৱশ্যে দুয়োগৰাকী সম্প্ৰতি সংকটমুক্ত বুলি জানিব পৰা গৈছে।
আনহাতে নিহত দুই মহিলাক মন্দিৰৰ কাষৰীয়া অঞ্চলৰ ওচৰৰ গাওঁসমূহৰ বাসিন্দা লীলাৱতী দেৱী (৪২) আৰু সুহাগমতী দেৱী (৪০) বুলি চিনাক্ত কৰা হৈছে।
Continue Reading
