'ভণ্ডামি জিন্দাবাদ!' প্ৰধানমন্ত্ৰী মোদীক কটাক্ষ কৰি এনেদৰে ক'লে জয়ৰাম ৰমেশে..কিন্তু কিয়?

প্ৰধানমন্ত্ৰী নৰেন্দ্ৰ মোদীয়ে ভাৰতীয় ৰাষ্ট্ৰীয় পতাকাক লৈ কৰা মন্তব্যক 'ভণ্ডামি' আখ্যা দিয়ে ৰাজ্যসভাৰ সাংসদ তথা কংগ্ৰেছ নেতা জয়ৰাম ৰমেশে। জয়ৰাম ৰমেশে কয় যে ''ভণ্ডামি জিন্দাবাদ!'' জয়ৰাম ৰমেশে প্ৰধানমন্ত্ৰী মোদীক কটাক্ষ কৰাৰ লগতে ৰাষ্ট্ৰীয় স্বয়ংসেৱক সংঘৰ ভূমিকাক লৈও প্ৰশ্ন উত্থাপন কৰে। তেওঁ প্ৰশ্ন কৰে যে নাগপুৰত সংঘৰ জাতীয় পতাকা উত্তোলন কৰিবলৈ ৫২ বছৰ কিয় লাগিল? প্ৰধানমন্ত্ৰী নৰেন্দ্ৰ মোদীৰ চৰকাৰে খাদীৰ পৰা ৰাষ্ট্ৰীয় পতাকা নিৰ্মাণ কৰা সকলৰ জীৱিকা নষ্ট কৰাৰ অভিযোগ উত্থাপন কৰে কংগ্ৰেছ দলে। উল্লেখযোগ্য যে দেশত "আজাদী কা অমৃত মহোৎসৱ" অনুষ্ঠিত হোৱাৰ সময়তে শুকুৰবাৰে প্ৰধানমন্ত্ৰী নৰেন্দ্ৰ মোদীয়ে সকলো ভাৰতীয়কে নিজৰ ঘৰৰ ওপৰত ৰাষ্ট্ৰীয় পতাকা উত্তোলন কৰিবলৈ আহ্বান জনায়। 

কংগ্ৰেছ নেতা জয়ৰাম ৰমেশে শুকুৰবাৰে প্ৰধানমন্ত্ৰী নৰেন্দ্ৰ মোদীক সমালোচনা কৰি জৱাহৰলাল নেহৰু আৰু ত্ৰিৰংগা সম্পৰ্কে এক ঐতিহাসিক তথ্য উপস্থাপন কৰাৰ বাবে ইয়াক “ভণ্ডামি জিন্দাবাদ” বুলি অভিহিত কৰে। কংগ্ৰেছে কয় যে যি ত্ৰিৰংগাৰ বাবে আমাৰ দেশৰ বহু লোক শ্বহীদ হৈছিল, সেই ত্ৰিৰংগা গ্ৰহণ কৰিবলৈ এটা সংগঠনে অস্বীকাৰ কৰিছিল, ৫২ বছৰ ধৰি নাগপুৰস্থিত আৰআৰএছৰ মুখ্য কাৰ্যালয়ত ত্ৰিৰংগা উত্তোলন কৰা নাছিল। অবিৰতভাৱে ত্ৰিৰংগা অপমানিত হৈছিল আৰু আজিও হৈ আছে।" একেটা সংগঠনৰ পৰা ওলাই অহা মানুহে ত্ৰিৰংগাৰ ইতিহাসৰ কথা কৈছে, তেওঁ ‘হৰ ঘৰ ত্ৰিৰংগা অভিযানৰ পৰিকল্পনা কৰাটো হাস্যকৰ। 

জয়ৰাম ৰমেশে কয় যে "৫২ বছৰ ধৰি আৰ এছ এছে নিজৰ মুখ্য কাৰ্যালয়ত ত্ৰিৰংগা উত্তোলন নকৰিলে কিয়? খাদীৰ পৰা জাতীয় পতাকা বনোৱা সকলৰ জীৱিকা কিয় ধ্বংস কৰা হৈছে? কিয় চীনৰ পৰা মেচিনত নিৰ্মিত, পলিষ্টাৰৰ পতাকা আমদানি কৰাৰ অনুমতি দিয়া হৈছিল? তেওঁ কয়, ‘মোদী জী, খাদীৰে নিৰ্মিত ত্ৰিৰংগাই দেশৰ আত্মশক্তিৰ প্ৰতিফলন ঘটায় আৰু লাখ লাখ মানুহৰ জীৱিকা তাৰ লগত সংলগ্ন হৈ আছে। আশাকৰোঁ এই ঐতিহাসিক দিনটোত আপোনালোকে খাদীৰ পৰা পতাকা নিৰ্মাতাসকলৰ কথা শুনি তেওঁলোকৰ দাবীৰ ওপৰত এক স্পৰ্শকাতৰ সিদ্ধান্ত ল'ব। 

উল্লেখ্য যে শুকুৰবাৰে প্ৰধানমন্ত্ৰী নৰেন্দ্ৰ মোদীয়ে ১৩ আগষ্টৰ পৰা ১৫ আগষ্টলৈ প্ৰতিজন ভাৰতীয়ক নিজ নিজ ঘৰত জাতীয় পতাকা উত্তোলন কৰি ‘হৰ ঘৰ ত্ৰিৰংগা’ অভিযানক শক্তিশালী কৰিবলৈ আহ্বান জনায়। মোদীয়ে টুইটযোগে কয় যে এই অভিযানে ত্ৰিৰংগাৰ সৈতে আমাৰ সম্পৰ্ক গভীৰ কৰি তুলিব।