ভোটাৰক ভেটি দি দোষী সাব্যস্ত সাংসদ, আদালতে বিহিলে এই শাস্তি

হায়দৰাবাদ : ভোটাৰক ভেটি দিয়াৰ গোচৰত দোষী সাব্যস্ত হল এগৰাকী সাংসদ। সম্ভৱতঃ প্ৰথমবাৰলৈ নিজৰ কাৰ্যকালতে এনে অভিযোগত এগৰাকী সাংসদ দোষী সাব্যস্ত হৈছে। ২০১৯ চনৰ লোকসভা নিৰ্বাচনত ভোটাৰক ভেটি দিয়াৰ অভিযোগ উঠিছিল টিআৰএছৰ লোকসভাৰ সাংসদ কবিতা মালোথৰ বিৰুদ্ধে।

শনিবাৰে তেওঁৰ লগতে তেওঁ সহযোগী এজনক সাংসদ বিধায়কৰ বাবে থকা এখন বিশেষ সত্ৰ আদালতে দোষী সাব্যস্ত কৰে। মহবুবাবাদৰ সাংসদ আৰু তেওঁ সহযোগী সৌকত আলীক এই গোচৰৰ মূল দোষী হিচাপে চিহ্নিত কৰি আদালতে তেওঁলোকক ছমাহৰ কাৰাবাস আৰু ১০হাজাৰ টকাৰ জৰিমণা বিহে।

অৱশ্যে উচ্চ ন্যায়ালয়ত আবেদন কৰাৰ বাবে তেওঁলোকক জামিনো প্ৰদান কৰে আদালতে। সাংসদগৰাকীয়ে উচ্চ ন্যায়ালয়ত এই ৰায়ক প্ৰত্যাহ্বান জনাব বুলি সংবাদ মাধ্যমত প্ৰকাশ পাইছে। উল্লেখ্য যে, সাংসদগৰাকীৰ সহযোগী আলীক নিৰ্বাচনৰ সময়ত ভোটাৰৰ মাজত ধন বিলাই থকা অৱস্থাত এটা ফ্লাইং স্কোৱাডে ধৰা পেলাইছিল। তাৰ পাছতে তেওঁ আৰু সাংসদ মালোথৰ বিৰুদ্ধে ৰুজু কৰা হৈছিল গোচৰ।