ডিজিটেল ডেস্কঃ তুৰস্ক-ছিৰিয়াত ৬ ফেব্ৰুৱাৰীত সংঘটিত হোৱা শক্তিশালী ভূমিকম্পৰ ফলত হাজাৰ হাজাৰ লোকৰ মৃত্যু হয়। মৃত্যুৰ সংখ্যাই ২১ হাজাৰ অতিক্ৰম কৰিলে। এফালে ভূমিকম্পই হাজাৰ হাজাৰ মানুহৰ জীৱন সম্পূৰ্ণৰূপে ধ্বংস কৰি পেলালে, আনফালে এই কৰুণ ঘটনাত এক অলৌকিক ঘটনাও সংঘটিত হ’ল। ভূমিকম্প অহাৰ আগে আগে এটি দেৱদূতৰ এই পৃথিৱীলৈ আগমন ঘটে। নৱজাতকটিয়ে জন্ম লৈছিল হে মাত্ৰ। মাতৃৰ সৈতে নৱজাতকটিৰ নাড়ী সংযুক্ত হৈয়ে আছিল। তেনেতে আহিল তুৰস্ক-ছিৰিয়াৰ সেই শক্তিশালী ভূমিকম্পটো।
নতুনকৈ জন্ম হোৱা শিশুটি সেই সময়ত মাতৃৰ সৈতে আছিল এটা চাৰিমহলীয়া অট্টালিকাত। ভূমিকম্পত অট্টালিকাটো তাচপাত খহাদি খহি ধ্বংস হৈ যায়। এই ভূমিকম্পত শিশুটিৰ পৰিয়ালৰ সকলোৰে মৃত্যু হয়। আচৰিত ধৰণে কেৱল শিশুটো জীয়াই থাকিল। উদ্ধাৰকাৰী দলে নাড়ী কাটি ধ্বংসস্তুপৰ মাজৰ পৰা শিশুটো উদ্ধাৰ কৰে। সকলোৰে মৃত্যু হোৱাৰ পাছতো শিশুটো কিদৰে ৰক্ষা পৰিল সেই কথাত সকলো আশ্চৰ্যচকিত হৈ উঠে।
কন্যা শিশুটিৰ নাম ৰখা হল ‘আয়া’। আৰৱী ভাষাত আয়াৰ অৰ্থ হৈছে - ‘ঈশ্বৰৰ চিন’ আৰু ‘চমৎকাৰ’। বৰ্তমান আয়াক এগৰাকী চিকিৎসকৰ পত্নীয়ে স্তনপান কৰোৱাই জীৱনদান দিছে। আয়াক খুৰাকৰ পৰিয়ালে গ্ৰহণ কৰা বুলি জানিবলৈ পোৱা গৈছে। ভূমিকম্পৰ ১০ ঘণ্টাৰো অধিক সময়ৰ পাছতহে উদ্ধাৰকাৰীয়ে আয়াক উদ্ধাৰ কৰিবলৈ সক্ষম হৈছিল। বৰ্তমান চিকিৎসালয়ত থকা আয়াৰ অৱস্থা ক্ৰমান্বয়ে উন্নত হৈ আহিছে আৰু তাইৰ মেৰুদণ্ডৰ কোনো ক্ষতি হোৱা নাই। সঁচাকৈয়ে এই ধ্বংসলীলাত এটি নৱজাতকৰ কোনো ক্ষতি নোহোৱাটো চমৎকাৰ নহয়নো কি....!
Continue Reading
