ডিজিটেল ডেস্কঃ এফালে ডাৱৰ বিস্ফোৰণ , আনফালে ভূমিস্খলনৰ সংহাৰে জনজীৱন ব্যাহত কৰি তুলিছে হিমাচল আৰু উত্তৰাখণ্ডত। দেওবাৰে নিশাৰ পৰা হোৱা বৰষুণত দুয়োখন ৰাজ্যত বহু লোকৰ মৃত্যু হৈছে। মঙলবাৰে উত্তৰাখণ্ডৰ চামোলী জিলাৰ ওচৰৰ হেলাং গাঁৱত ঘৰ খহি পৰাত বহু লোক হতাহত হয়।
এই প্ৰতিবেদন লিখাৰ সময়ত ঘটনাস্থলীৰ পৰা তিনিজন লোকক উদ্ধাৰ কৰা হৈছে। ৰাজ্যিক দুৰ্যোগ সঁহাৰি বাহিনীয়ে উদ্ধাৰ কৰা আহতসকলক ততাতৈয়াকৈ ওচৰৰ চিকিৎসালয়লৈ লৈ যোৱা হৈছে।ঘটনাটো মঙলবাৰে সন্ধিয়া বদ্ৰীনাথ পথৰ পিপালকোটি আৰু যোশীমঠৰ মাজৰ হেলাং গাঁৱত সংঘটিত হৈছে। আৰক্ষীয়ে জনোৱা অনুসৰি অলকানন্দা নদীৰ কাষত খননকাৰ্যত জড়িত শ্ৰমিকসকল থকা দুমহলীয়া ঘৰ হঠাতে খহি পৰে।
হিমাচল প্ৰদেশতো বানৰ সংহাৰ অব্যাহত আছে। মঙলবাৰে সন্ধিয়া প্ৰায় ৫.৩০ বজাত হিমাচল প্ৰদেশৰ চিমলাৰ কৃষ্ণনগৰ অঞ্চলত চাৰিটা ঘৰ খহি পৰে। ফলত দুজন লোকৰ মৃত্যু ঘটে। ধ্বংসাৱশেষৰ তলত বহু লোক আবদ্ধ হৈ থকা বুলি সন্দেহ কৰা হৈছে। আশংকা কৰা হৈছে যে কমেও পাঁচৰ পৰা ১০ জন লোক এতিয়াও আৱদ্ধ হৈ আছে। ৰাজ্যিক দুৰ্যোগ সঁহাৰি বাহিনীয়ে এতিয়াও উদ্ধাৰ অভিযান চলাই আছে।
হিমাচল প্ৰদেশৰ মুখ্যমন্ত্ৰী সুখবিন্দৰ সিং সুখুৱে খবৰটো পোৱাৰ লগে লগে ঘটনাস্থলীলৈ যায়। তেওঁ অঞ্চলটো খালি কৰাৰো নিৰ্দেশ দিয়ে। ৰাজ্যখনৰ পৰিস্থিতিৰ প্ৰতি লক্ষ্য ৰাখি মুখ্যমন্ত্ৰীয়ে বুধবাৰে সকলো বিদ্যালয় আৰু মহাবিদ্যালয় বন্ধ ৰখাৰ নিৰ্দেশ দিছে।
Continue Reading
