ডিজিটেল ডেস্কঃ সৰ্প দংশন নহয়, নহয় কোনো বিষাক্ত পোকৰো দংশন । উৰহৰ কামোৰতে প্ৰাণ গ’ল এজন কাৰাবন্দীৰ। এই ঘটনা ঘটিছে আমেৰিকাৰ আটলাণ্টাৰ কাৰাগাৰত। উৰহৰ কামোৰত বন্দীৰ মৃত্যু হোৱাৰ অভিযোগে এতিয়া বহুতকে আচৰিত কৰি তুলিছে।
অভিযোগ অনুসৰি কাৰাগাৰত থকা পোক-পতংগ আৰু উৰহৰ কামোৰৰ ফলতে এজন বন্দীৰ মৃত্যু হৈছে। মৃত কয়েদীজনৰ পৰিয়ালে দাবী কৰিছে যে পোক-পতংগ আৰু উৰহে জীৱিত অৱস্থাতে কাৰাবন্দী জনৰ বিভিন্ন অংগ খাই পেলায়! 
সেয়ে অসহ্য যন্ত্ৰণা ভুগি অৱশেষত তেওঁৰ মৃত্যু হয়। জানিব পৰা মতে ধৰ্ষণৰ গোচৰত দোষী সাব্যস্ত হোৱাৰ পিছত লেচন থম্পছন নামৰ লোক জনক শাস্তি প্ৰদান কৰা হৈছিল। তেওঁক কিছুদিন সাধাৰণ কাৰাগাৰত ৰখা হৈছিল যদিও বিচাৰকসকলে দোষী ব্যক্তিজনক মানসিকভাৱে অসুস্থ বুলি ঘোষণা কৰে। তাৰ পিছতে তেওঁক ফুলটন কাউণ্টি কাৰাগাৰৰ মনোৰোগ শাখালৈ স্থানান্তৰ কৰা হৈছিল।
তাতেই তেওঁক উৰহ আৰু আন পতংগই কামুৰি মৃত্যুৰ মুখলৈ ঠেলি দিয়ে। উল্লেখ্য আমেৰিকাৰ সেই কাৰাগাৰ খন অতি লেতেৰা বুলি বহুতে অভিযোগ কৰি আহিছে। লেতেৰা পৰিবেশৰ বাবেই কাৰাগাৰ খনত জাক জাক উৰহ আৰু আন পতংগই বাহ বান্ধিছে। তেনে পতংগ আৰু উৰহৰ কামোৰতে বন্দী জনৰ মৃত্যু হোৱা বুলি লোক জনৰ পৰিয়ালে অভিযোগ কৰিছে।
Continue Reading
