ভয়ংকৰ পথ দুৰ্ঘটনা! থিতাতে প্ৰাণ গ’ল ৯গৰাকীৰ

ডিজিটেল ডেস্ক: উত্তৰ প্ৰদেশত সংঘটিত হোৱা এক ভয়ংকৰ পথদুৰ্ঘটনাই এতিয়া ৰাষ্ট্ৰীয় সংবাদ শিৰোনাম দখল কৰিছে। খবৰ অনুসৰি, উত্তৰ প্ৰদেশৰ বাৰাবাঁকী জিলাত এখন ট্ৰাক আৰু যাত্ৰীবাহী বাছৰ মুখামুখি সংঘৰ্ষ হোৱাৰ ফলত ৯জন লোক নিহত হোৱাৰ লগতে ২৭জন লোক গুৰুত্বৰভাৱে আঘাতপ্ৰাপ্ত হৈছে।

যাত্ৰীবাহী বাছখন বৃহস্পতিবাৰে পুৱা প্ৰায় ৫:৩০ বজাত উত্তৰ প্ৰদেশৰ দেৱাকোতলী অঞ্চলৰ কিষাণ পথৰ বাবুৰী গাঁৱৰ সমীপতে বিপৰীত দিশৰ পৰা কম্পিউটাৰৰ সামগ্ৰী কঢ়িওৱা এখন ট্ৰাকৰ লগত মুখামুখি সংঘৰ্ষ হয়। প্ৰত্যক্ষদৰ্শীৰ মতে, দুয়োখন বাহনৰ গতিবেগ ইমানেই বেছি আছিল যে, সংঘৰ্ষৰ ফলত যাত্ৰীবাহী বাছখন আৰু ট্ৰাকখনৰ সন্মুখভাগ বেয়াকৈ ক্ষতিগস্ত হৈছে। আৰক্ষী-প্ৰশাসনৰ লোকসকলে বাছখনৰ সন্মুখভাগৰ কিছু অংশ কাটি লোকসকলক উদ্ধাৰ কৰাৰ লগতে গুৰুতৰভাৱে আঘাতপ্ৰাপ্ত হোৱা লোকসকলক উন্নত চিকিৎসাৰ বাবে ৰাজধানী লক্ষ্ণৌৰ চিকিংসালয়লৈ প্ৰেৰণ কৰিছে লগতে আহতসকলক বাৰাবাঁকী জিলাৰ স্থানীয় চিকিৎসালয়ত ভৰ্তি কৰিছে।

শোকাৱহ দুৰ্ঘটনাটোক লৈ উত্তৰ প্ৰদেশৰ মুখ্যমন্ত্ৰী যোগী আদিত্যনাথে নিহত পযিয়ালক ২ লাখ টকা আৰু আহতসকলক ৫০,০০০হাজাৰ টকাৰ আৰ্থিক অনুদান আগবঢ়াইছে। লগতে মুখ্যমন্ত্ৰীজনে পথদুৰ্ঘটনাত প্ৰাণ হেৰুওৱা লোকসকলৰ প্ৰতি গভীৰ শোকপ্ৰকাশ কৰাৰ লগতে আহতসকলক উপযুক্ত চিকিৎসা প্ৰদান কৰিব বুলি আশ্বাস প্ৰদান কৰিছে।