ডিজিটেল ডেস্কঃ শনিবাৰে দুদিনীয়া ভ্ৰমণৰ বাবে ইজিপ্তৰ কায়ৰো চহৰত উপস্থিত হয় ভাৰতৰ প্ৰধানমন্ত্ৰী নৰেন্দ্ৰ মোদী৷উপস্থিত হোৱাৰ লগে লগে প্ৰধানমন্ত্ৰী নৰেন্দ্ৰ মোদীক এক সুৰীয়া আদৰণি জনোৱা হয়। এই ভ্ৰমণৰ সময়ত মোদীয়ে ৰাষ্ট্ৰপতি আব্দেল ফাত্তাহ এল-চিছিকে ধৰি ইজিপ্তৰ শীৰ্ষস্থানীয় নেতৃত্বৰ সৈতে আলোচনাত মিলিত হ’ব।
মোদীৰ আদৰণি অনুষ্ঠানতে শাৰী পৰিধান কৰি ইজিপ্তৰ এগৰাকী মহিলাই ‘শ্বোলে’ চিনেমাৰ জনপ্ৰিয় গীত ‘য়েহ দোস্তী হম নেহী ত’ৰেংগে’ৰে উষ্ম আদৰণি জনায়। গীতটি পৰিৱেশনৰ সময়ত প্ৰধানমন্ত্ৰীগৰাকীয়ে মনোযোগেৰে গীতটো শুনি থকা দেখা গৈছিল আৰু মহিলাগৰাকীৰ হিন্দীৰ সীমিত জ্ঞান আৰু পূৰ্বে কেতিয়াও ভাৰত ভ্ৰমণ নকৰাৰ কথা প্ৰকাশ কৰাত আশ্বৰ্য প্ৰকাশ কৰিছিল।
প্ৰধানমন্ত্ৰী মোদীয়ে তেওঁক উদ্দেশ্যি কয় যে, "আপুনি ইজিপ্তৰ নে ভাৰতীয় মহিলা কোনেও ক’ব নোৱাৰিব"৷ প্ৰধানমন্ত্ৰীৰ সন্মুখত গীত পৰিৱেশন কৰাৰ পাছত তেওঁৰ অনুভৱৰ বিষয়ে সোধাত জনাই যে তেওঁ নিজকে “সন্মানিত” অনুভৱ কৰিছে আৰু কয় যে প্ৰধানমন্ত্ৰী মোদীক সাক্ষাৎ কৰি যথেষ্ট সুখী৷
তদুপৰি যুৱতীগৰাকীয়ে জনাই যে তেওঁ ছয় বছৰ বয়সৰ পৰা আৰম্ভ কৰি বিগত ১২-১৩ বছৰ ধৰি হিন্দী গীতৰ অভ্যাস কৰি আহিছে৷
উল্লেখ্য যে ইজিপ্তৰ ৰাষ্ট্ৰপতি এল-চিছিৰ আমন্ত্ৰণত প্ৰধানমন্ত্ৰী মোদী বৰ্তমান ইজিপ্ত ভ্ৰমণত আছে, যিটো ভ্ৰমণ ২৬ বছৰৰ পাছত ভাৰতীয় প্ৰধানমন্ত্ৰীৰ প্ৰথমটো দ্বিপাক্ষিক ভ্ৰমণ। বিমানবন্দৰত মোদীৰ বাবে অপেক্ষা কৰি আছিল একাংশ বিশেষ ব্যক্তি, য’ত ইজিপ্তৰ প্ৰধানমন্ত্ৰী মোস্তাফা মেডবৌলিয়ে মোদীক আলিংগন কৰে। তেওঁৰ আগমনৰ লগে লগে আনুষ্ঠানিকভাৱে আদৰণি জনোৱাৰ লগতে গাৰ্ড অৱ অনাৰৰ ব্যৱস্থাও ইজিপ্তৰ তৰফৰ পৰা কৰা হয়।
Continue Reading
