ডিজিটেল ডেস্ক: বিপদে লগ নেৰা হৈছে দেশৰ অগ্ৰণী বিমান পৰিবহন কোম্পানী ইণ্ডিগ’ক। শেহতীয়া কেইটামান দিনত যাত্ৰাপথত দেখা দিয়া কাৰিকৰী বিজুতিৰ ফলত যাত্ৰাপথ সলনি কৰি অন্য কোনো পৃথক বিমানবন্দৰত বিমান অৱতৰণ কৰিবলৈ বাধ্য হৈছে ইণ্ডিগ’ৰ কেইবাখনো বিমানে। বৃহস্পতিবাৰে পুনৰ এনে এক পৰিস্থিতিৰ সন্মুখীন হৈছে ইণ্ডিগ’ৰ এখন বিমান।
অৱশ্যে এইবাৰ কাৰিকৰী বিজুতিৰ বাবে নহয়, বিমান যাত্ৰীৰ উদ্বেগজনক দাবীৰ বাবেহে এনেদৰে গন্তব্যস্থানৰ পৰিৱৰ্তে পৃথক স্থানত বিমান অৱতৰণ কৰিবলৈ বাধ্য হৈছে। দিল্লী অভিমুখী ইণ্ডিগোৰ 6E 2126 বিমানখৰ এজন যাত্ৰীয়ে যাত্ৰাপথতে তেওঁৰ বেগত বোমা কঢ়িয়াই নিয়া বুলি দাবী কৰে।
যাত্ৰীগৰাকীৰ এনে অদ্ভুত দাবীৰ পাছতে বিমানখনত এক আতংকময় পৰিস্থিতিৰ সৃষ্টি হয়। বিমানত থকা যাত্ৰীৰ লগতে বিমান পৰিচালক সকল এই আশ্চৰ্যকৰ দাবীত হতবাক হৈ পৰে। এনে পৰিস্থিতিত পাইলটে বিমানখন পাটনা বিমানবন্দৰত অৱতৰণ কৰিবলৈ বাধ্য হয়।
বিমানখন বিমানবন্দৰত উপস্থিত হোৱাৰ পাছতে বিমানবন্দৰত থকা বোমা স্কোৱাড আৰু আৰক্ষীয়ে লগে লগে বিমানখনত তালাচী চলায়। বোমা কঢ়িয়াই নিয়া বুলি দাবী কৰা ব্যক্তিজনৰ বেগসমূহ পৰীক্ষা কৰাৰ পাছতো কোনো ধৰণৰ বিস্ফোৰক সামগ্ৰীৰ সন্ধান পোৱা নগ'ল।
স্থানীয় কৰ্তৃপক্ষই জানিবলৈ দিয়া মতে আৰক্ষীয়ে ইতিমধ্যে যাত্ৰীগৰাকীক বিমানবন্দৰতে আটক কৰিছে। ধৃত যাত্ৰীজনক ঋষি চান্দ সিং বুলি চিনাক্ত কৰা হৈছে।
আনহাতে বিমানবন্দৰৰ নিৰাপত্তা বিষয়াসকলে ধৃত যাত্ৰীগৰাকী মানসিকভাৱে সুস্থ নহয় বুলি দাবী কৰিছে।
Continue Reading
