ডিজিটেল ডেস্কঃ ইজৰাইল-পেলেষ্টাইনৰ যুঁজ খন ক্ৰমাৎ অধিক ৰক্তক্ষয়ী হৈ পৰিছে। এনে সময়তে পেলেষ্টাইনৰ সমৰ্থনত ওলাই আহিছে বহু মুছলমান নেতা। যদি ইজৰাইলী সেনাই গাজাৰ ওপৰত আক্ৰমণ অব্যাহত ৰাখে,তেন্তে মুছলমান বিশ্বই প্ৰতিশোধ ল'ব বুলি এইবাৰ সকীয়াই দিলে ইৰাণৰ সৰ্বোচ্চ নেতা আয়াতুল্লা আলী খোমেনিয়ে । খোমেনিয়ে মঙলবাৰে এই সতৰ্কবাণী জাৰি কৰে।
গাজাত ইজৰাইল-হামাছৰ যুদ্ধৰ ১১ সংখ্যক দিনটোত ইৰাণৰ চৰকাৰী টেলিভিছনত খোমেনিয়ে কয়, "যদি পেলেষ্টাইনী জনসাধাৰণৰ বিৰুদ্ধে ইহুদী শাসকসকলে অত্যাচাৰ অব্যাহত ৰাখে , তেন্তে কোনেও মুছলমান বিশ্বৰ প্ৰতিৰোধ শক্তিৰ সন্মুখত তিষ্ঠি থাকিব নোৱাৰিব।" তেওঁ লগতে কয় যে গাজাত বোমা বিস্ফোৰণ শীঘ্ৰে বন্ধ হ'ব লাগিব। খোমেনীয়ে চৰকাৰী সংবাদ মাধ্যমত কৰা এনে ঘোষণাই এতিয়া তীব্ৰ প্ৰতিক্ৰিয়াৰ সৃষ্টি কৰিছে।
তেওঁ দাবী কৰে যে ৭ অক্টোবৰৰ পুৱতি নিশা গাজা সীমান্তৰ ওচৰৰ ইজৰাইলী ভূখণ্ডত হামাছৰ কেইবাটাও ৰকেট আক্ৰমণৰ ঘটনাত ইৰাণৰ কোনো সমৰ্থন নাই। তেওঁ পোনপটীয়াকৈ ইজৰাইলৰ বিৰুদ্ধে সামৰিক ব্যৱস্থা গ্ৰহণৰো ভাবুকি দিয়ে। যোৱা সপ্তাহত আমেৰিকা যুক্তৰাষ্ট্ৰই ইৰাণৰ ৰাষ্ট্ৰপতি ইব্ৰাহিম ৰাইচিৰ চৰকাৰক সতৰ্ক কৰি দিছিল যে তেহৰানে ইজৰাইল-হামাছ যুদ্ধত জড়িত হ'লে ইয়াৰ পৰিণাম ভয়ংকৰ হ'ব।
ইজৰাইলী বাহিনীয়ে ইতিমধ্যে লেবানন সীমান্তত ইৰাণ সমৰ্থিত ছিয়া সশস্ত্ৰ বাহিনী হিজবুল্লাৰ সৈতে যুদ্ধ কৰি আহিছে। তেল আভিভে কৈছে যে মঙলবাৰে পুৱতি নিশা লেবাননৰ সীমান্ত পাৰ হৈ ইজৰাইলী অঞ্চললৈ যাবলৈ চেষ্টা কৰাৰ সময়ত চাৰিজন হিজবুল্লা যুঁজাৰু নিহত হৈছে। এনে পৰিস্থিতিত খোমেনীৰ "মুছলমান বিশ্বৰ প্ৰতি প্ৰতিশোধ" লোৱাৰ ভাবুকি গুৰুত্বপূৰ্ণ বিবেচিত হৈছে। ইৰাণৰ বৈদেশিক মন্ত্ৰী হোছেইন আমিৰ আব্দোল্লাহিয়ানে সোমবাৰে ইজৰাইলক সতৰ্ক কৰি দিছিল যে "যদি ইহুদীসকলৰ আক্ৰমণ বন্ধ নহয়, তেন্তে আমিও বন্দুক সাজু ৰাখিছো।"
Continue Reading
