ডিজিটেল ডেস্কঃ পাকিস্তানৰ প্ৰাক্তন প্ৰধানমন্ত্ৰী ইমৰান খানৰ ওপৰত আহি পৰিছে প্ৰচণ্ড চাপ। দেওবাৰে আৰক্ষীয়ে খানক গ্ৰেপ্তাৰ কৰিবলৈ লাহোৰত উপস্থিত হৈছে৷ ইছলামাবাদৰ পৰা যোৱা আৰক্ষীৰ বিশাল দলে লাহোৰত থকা ইমৰানৰ ঘৰত উপস্থিত হোৱাৰ পিছতে পিটিআইৰ সমৰ্থকসকলে আৰক্ষীক বাধা দিয়ে৷ পাকিস্তানৰ প্ৰাক্তন প্ৰধানমন্ত্ৰীগৰাকীৰ বিৰুদ্ধে গ্ৰেপ্তাৰ পৰোৱানা লৈ উপস্থিত হোৱা বৃহৎ আৰক্ষী বাহিনীৰ সৈতে পিটিআইৰ সমৰ্থকসকলে তৰ্কত লিপ্ত হোৱা দেখা গৈছে৷
ইমৰান খানক গ্ৰেপ্তাৰ কৰিলে পাকিস্তানত জুই জ্বলিব বুলিও পিটিআই-এ সকিয়াই দিছে৷ উপস্থিত হৈছে।লাহোৰৰ আৰক্ষী মহাপৰিদৰ্শকে এছএছপিক নিৰ্দেশ দিছে যে কোষাগাৰৰ সম্পত্তিৰ অপব্যৱহাৰৰ দুৰ্নীতিৰ গোচৰ সন্দৰ্ভত দেওবাৰে ইমৰান খানক গ্ৰেপ্তাৰ কৰা হ'ব। এই নিৰ্দেশৰ পিছতে লাহোৰৰ জামান পাৰ্কত থকা ইমৰানৰ ঘৰত এক বৃহৎ আৰক্ষী বাহিনী উপস্থিত হয়। আৰক্ষীয়ে কৈছে যে পাকিস্তানৰ আইন সকলোৰে বাবে সমান। ইফালে ইমৰান খানৰ সমৰ্থকসকলে তেওঁলোকৰ প্ৰিয় নেতাজনক গ্ৰেপ্তাৰ কৰা প্ৰতিহত কৰিবলৈ তেওঁৰ বাসগৃহ ঘেৰাও কৰি ৰাখিছে৷
উল্লেখ্য ইমৰান খানে প্ৰধানমন্ত্ৰী হৈ থকাৰ সময়ত বিদেশৰ পৰা লাভ কৰা বহু উপহাৰ বিক্ৰী কৰাৰ গোচৰৰ শুনানি চলি আছে। পাকিস্তানৰ আইন অনুসৰি তেনে উপহাৰ নিজৰ ইচ্ছানুসৰি কোনেও বিক্ৰী কৰিব নোৱাৰে৷ পাকিস্তানৰ প্ৰাক্তন প্ৰধানমন্ত্ৰী খানে শুনানিত ব্যক্তিগতভাৱে উপস্থিত হোৱা নাছিল। ফলত তেওঁক গ্ৰেপ্তাৰ কৰাৰ সম্ভাৱনা প্ৰকট হৈ পৰিছে।
হাজাৰ হাজাৰ পিটিআই সমৰ্থকে ইমৰান খানৰ ঘৰ ঘেৰি ধৰিছে। ইমৰান-সমৰ্থকসকলে আৰক্ষীৰ সৈতে সংঘৰ্ষত লিপ্ত হোৱাৰো বাতৰি আহিছে৷ উল্লেখ্য ইয়াৰ পূৰ্বেও দুৰ্নীতিৰ অভিযোগত ইমৰানক গ্ৰেপ্তাৰ কৰিব বিচৰা হৈছিল৷। সেই সময়তো সমৰ্থকসকলে একেধৰণে প্ৰতিবাদ কৰিছিল। অৱশেষত আদালতৰ নিৰ্দেশত ইমৰান খান গ্ৰেপ্তাৰ পৰা ৰক্ষা পৰিছিল। সবিশেষ বাতৰিৰ বাবে অপেক্ষা কৰা হৈছে৷
Continue Reading
