ডিজিটেল ডেস্কঃ পেট ওলালে সকলো চিন্তাত পৰে। পেট ওলালে শৰীৰটোৰ আকৰ্ষণ কমি যায়। সেয়েহে সকলোৱে পেট কমোৱাৰ বাবে নানা উপায় অৱলম্বন কৰে। ছিক্স পেক পাবৰ বাবে কঠোৰ পৰিশ্ৰম কৰে। পাছে এইখন পৃথিৱীতে আছে এনে এখন ঠাই য'ত ডাঙৰ পেটৰ পুৰুষক আটাইতকৈ আকৰ্ষণীয় বুলি গণ্য কৰা হয়। তেওঁলোকে লাভ কৰে নায়কৰ দৰে সন্মান। এই নিয়ম প্ৰচলিত আছে আফ্ৰিকাৰ ইথিওপিয়াৰ বডি জনজাতিৰ মাজত।
বডি জনজাতিয়ে আটাইতকৈ ডাঙৰ পেটৰ পুৰুষগৰাকীক আটাইতকৈ বেছি সন্মান কৰে। ইথিওপিয়াৰ ওমো উপত্যকাৰ এটা দূৰৱৰ্তী অঞ্চলত বাস কৰে বডি জনজাতিয়ে। পেটটো চৰ্বিৰে শকত কৰিবৰ বাবে তেওঁলোকে গৰুৰ তেজ আৰু গাখীৰ খায়। বডি জনজাতিৰ বাবে গৰু অতি পবিত্ৰ প্ৰাণী, সেয়ে ইহঁতক হত্যা কৰা নহয়। বৰং গৰুৰ শিৰা কাটি তাৰ পৰা তেজ উলিয়াই লোৱা হয়। ইয়াত এটা প্ৰতিযোগিতা অনুষ্ঠিত কৰা হয়। সেই প্ৰতিযোগিতাতে আটাইতকৈ শকত পেটৰ পুৰুষজনক বাচনি কৰা হয়।
এই প্ৰতিযোগিতাৰ বাবে পুৰুষসকলে ছমাহজোৰা প্ৰস্তুতি চলায়। প্ৰতিটো পৰিয়ালৰ এজন অবিবাহিত পুৰুষে ইয়াত অংশগ্ৰহণ কৰিব পাৰে। প্ৰতিযোগিতাৰ বাবে নিৰ্বাচিত হোৱাৰ পাছত তেওঁ ছমাহ এটা জুপুৰীত থাকে য’ত তেওঁক বাহিৰলৈ ওলাই যাবলৈ বা যৌন সম্পৰ্ক স্থাপন কৰিবলৈ দিয়া নহয়। এই লোকসকলে গৰুৰ তেজ আৰু গাখীৰৰ মিশ্ৰণ খাদ্য হিচাপে গ্ৰহণ কৰে। গাঁৱৰ মহিলাসকলে নিয়মিতভাৱে এই মিশ্ৰণ পুৰুষসকলক যোগান ধৰে।
গোটেই দিনটো এই পুৰুষসকলে গৰুৰ গাখীৰ আৰু তেজ খায়। প্ৰথম কাপটো ২ লিটাৰৰ থাকে, যিটো সূৰ্য্য উদয়ৰ সময়ত খোৱা হয়। বাকী কাপবোৰ দিনটোৰ যিকোনো সময়তে সেৱন কৰিব পাৰি। কিছুমান পুৰুষে ছমাহ ধৰি প্ৰতিযোগিতাৰ বাবে প্ৰস্তুতি চলাই ইমানেই শকত হৈ পৰে যে খোজ কাঢ়িবও নোৱাৰে।
প্ৰতিযোগিতাৰ দিনা ছাই-বোকাৰে শৰীৰ ঢাকি গোটেই গাঁৱৰ সন্মুখত নিজৰ শৰীৰটো দেখুৱাই, জপিয়াই নিজৰ শ্ৰেষ্ঠত্ব প্ৰদৰ্শন কৰিবলৈ পুৰুষসকল উঠিপৰি লাগে। ইয়াৰ উপৰিও পবিত্ৰ গছবোৰৰ চাৰিওফালে তেওঁলোকে ঘন্টা ধৰি ঘূৰি ফুৰে। বিচাৰক হিচাপে বয়োজ্যেষ্ঠসকলে সিদ্ধান্ত লয় যে পুৰুষসকলৰ ভিতৰত কোনজনৰ পেট আটাইতকৈ ডাঙৰ আৰু কোনে ভাল প্ৰদৰ্শন কৰিছে। জয়ী হোৱা পুৰুষজনক গাঁৱৰ আটাইতকৈ শকত মানুহ বুলি গণ্য কৰি গোটেই বছৰটো তেওঁৰ প্ৰশংসা কৰা হয়। বডি জনজাতিৰ প্ৰতিটো শিশুৱেই সৰুৰে পৰা এই সন্মান পোৱাৰ সপোন পুহি ৰাখে।
এই জনজাতিটো জীৱিকাৰ বাবে পশুপালন আৰু গৰু-ম’হৰ ওপৰত সম্পূৰ্ণৰূপে নিৰ্ভৰশীল। বডি পুৰুষসকল উলংগ হৈ থাকে আৰু কঁকালত কপাহী বেল্ট পিন্ধে।
Continue Reading
