ডিজিটেল ডেস্কঃ টুইটাৰ এৰিলে কৰণ জোহৰে। সোমবাৰে এটা টুইটৰ যোগেৰে এই কথা ঘোষণা কৰে বলিউডৰ জনপ্ৰিয় ছৱি পৰিচালকজনে।
টুইটাৰ এৰাৰ আগমুহূৰ্তত এটা টুইটত তেওঁ লিখে যে যোগাত্মক শক্তি আহৰণৰ বাবে তেওঁ মনোনিৱেশ কৰিছে। তাৰ প্ৰথম পদক্ষেপ হিচাপে টুইটাৰ বাদ দিছে। অৱশ্যে বৰ্তমানলৈকে নিজৰ টুইটাৰ একাউণ্টটো তেওঁ ডিলেট কৰা নাই।
কৰণ জোহৰৰ এই টুইটটোৰ প্ৰতিক্ৰিয়া স্বৰূপে তেওঁৰ অনুৰাগীসকলে জোহৰক অধিক সৃষ্টিশীল কামত মনোযোগ দিবলৈ আহ্বান কৰিছে। অনুৰাগীসকলে জোহৰক তেওঁৰ মানসিক স্বাস্থ্যৰ প্ৰতি সজাগ হ’বলৈ আহ্বান কৰিছে।
উল্লেখযোগ্য যে কৰণ জোহৰৰ শেহতীয়া ছৱি ব্ৰহ্মাস্ত্ৰই ব্যাপকভাৱে ভিন্ন প্ৰতিক্ৰিয়া লাভ কৰিছে। আলিয়া ভাট আৰু ৰণবীৰ কাপুৰৰ অভিনয়সমৃদ্ধ চিনেমাখন বিশ্বজুৰি ৪২৫ কোটি টকাৰ ব্যৱসায় কৰিছে বুলি জানিব পৰা গৈছে।
বলিউড হাংগামাক দিয়া এটা শেহতীয়া সাক্ষাৎকাৰত পৰিচালকগৰাকীয়ে কয় যে ব্ৰহ্মাস্ত্ৰক লৈ বলিউডৰ বহুকেইজন গণ্য মাণ্য ব্যক্তিয়ে ঋণাত্মক মন্তব্য কৰিছে। ই বলিউড উদ্যোগটোক ক্ষতি কৰিব বুলি জোহৰে মত প্ৰকাশ কৰিছে।
