১০লাখ মুক্তিপণ ! বলীউড চিনেমা চাই ২ যুৱকে অপহৰণ কৰি হত্যা কৰিলে বন্ধুক

ডিজিটেল ডেস্ক : বলীউড চিনেমা চাই অনুপ্ৰাণিত হয় নেকি আপুনি ? সাৱধান হওক৷ চিনেমাৰ কায়দা তথা বিভিন্ন ষ্টাইল অনুসৰণ কৰিবলৈ গৈ দুজন যুৱকে সংঘটিত কৰিছে এক হত্যাকাণ্ড৷ প্ৰথমে অপহৰণ, তাৰ পাছত মুক্তিপনৰ বাবে টকা দাবী আৰু শেষত হত্যাকাণ্ড৷ উত্তৰ দিল্লীৰ চি বুৰাৰীত দুজন যুৱকে এজন ১৮ বছৰীয়া ল'ৰাক অপহৰণ কৰি দাবী কৰিছিল ১০ লাখ মুক্তিপণ৷ অভিযুক্ত দুয়োজন যুৱককে আৰক্ষীয়ে গ্ৰেপ্তাৰ কৰে ঘটনা সন্দৰ্ভত৷ ডিচিপি (উত্তৰ) সাগৰ সিং কালচিয়ে জনোৱা মতে বুৰাৰীৰ বাসিন্দা অভিযুক্তদুয়োজন ১৯ বছৰ বয়সৰ আছিল৷ লগতে তেওঁলোকে বলীউডৰ 'অপহৰণ' নামৰ ছবিখন চাই অনুপ্ৰাণিত হৈছে৷ হত্যাৰ বলি হোৱা যুৱকজনৰ নাম ৰোহন বুলি জানিব পৰা গৈছে৷ আনহাতে, আৰক্ষীয়ে কৈছিল যে ভুক্তভোগী ৰোহনৰ বন্ধু অভিযুক্তৰ এজন শ্ব'ৰুমত চাফাইকৰ্মী হিচাপে কাম কৰি আছিল। অভিযুক্তজনে ৰোহনক এটা জন্মদিনৰ পাৰ্টিলৈ লৈ যায় আৰু তেওঁলোকে ১০ লাখ টকাৰ মুক্তিপণ দাবী কৰাৰ পৰিকল্পনা কৰে। দেওবাৰে নিশা প্ৰায় ১১.৩০ বজাত ঘৰলৈ ঘূৰি নহাত ৰোহনৰ পৰিয়ালে আৰক্ষীৰ কাষ চাপিছিল৷ 'ৰোহনৰ ফোনৰ অৱস্থান উত্তৰ প্ৰদেশৰ মোৰাদাবাদত পোৱা গৈছিল। প্ৰায় ২০০ টা চিচিটিভি বিশ্লেষণ কৰা হৈছিল আৰু বুধবাৰে পুৱতি নিশা এজন অভিযুক্তক আটক কৰা হৈছিল," কালচিয়ে কয়। আটকাধীন যুৱকজনৰ তথ্যৰ ভিত্তিতে হৰিত বিহাৰৰ পৰা মৃতদেহটো উদ্ধাৰ কৰা হৈছিল আৰু গ্ৰেপ্তাৰ কৰা হৈছিল অভিযুক্তজনক৷