ডিজিটেল ডেস্ক: ৰতন টাটাৰ মৃত্যুত সমগ্ৰ দেশেই শোক প্ৰকাশ কৰিছে। যোৱা ৯ অক্টোবৰত মুম্বাইৰ ব্ৰিচ কেণ্ডি হাস্পতালত ৮৬ বছৰ বয়সত শেষ নিশ্বাস ত্যাগ কৰিছিল ৰতন টাটাই। তেওঁৰ মৃত্যুৰ খবৰ শুনি সমগ্ৰ দেশৰ চকু ভৰিছিল। তেওঁ সমগ্ৰ জীৱন দেশ আৰু ভাৰতৰ জনসাধাৰণৰ সেৱাত উৎসৰ্গা কৰিছিল। বহু লোকে তেওঁৰ বাবে ভাৰত ৰত্নৰো দাবী উত্থাপন কৰিছে।
ভাৰতে কেতিয়াও পাহৰিব নোৱাৰে ৰতন টাটাক, এজন অতি সম্ভ্ৰান্ত, সত্য আৰু সহজ ব্যক্তিত্বৰ গৰাকী তেওঁ। মানুহে তেওঁক স্মৰণ কৰি নিজৰ নিজৰ ধৰণেৰে শ্ৰদ্ধাঞ্জলি জনাইছে। এনে সময়ত চুৰাটৰ এজন হীৰা ব্যৱসায়ীয়ে ১১০০০ আমেৰিকান হীৰাৰ সহায়ত ৰতন টাটাৰ এক আচৰিত প্ৰতিকৃতি সাজি উলিয়াইছে। এই প্ৰতিকৃতি নিৰ্মাণ কৰা শিল্পীৰ নাম বিপুলভাই জেপিৱালা। তেওঁ প্ৰয়াত ৰতন টাটাক হীৰাৰে বিশাল প্ৰতিকৃতি নিৰ্মাণ কৰি আৱেগিক শ্ৰদ্ধাঞ্জলি জনায়।
এইগৰাকী শিল্পীয়ে প্ৰতিকৃতি নিৰ্মাণ কৰা ভিডিঅ’টো ছ’চিয়েল মিডিয়াত ভাইৰেল হৈ পৰিছে। য’ত দেখা গৈছে যে ৰতন টাটাক শ্ৰদ্ধাঞ্জলি জনাই শিল্পীজনে সৰু সৰু আমেৰিকান হীৰাৰ সহায়ত এখন ছবি অংকন কৰিছে। ৰতন টাটাৰ এই প্ৰতিকৃতিটো হুবহু প্ৰয়াত ৰতন টাটাৰ দৰেই। হীৰাৰে কৰা এই জটিল ছবিৰ বাবে শিল্পীজনক সকলোৱে প্ৰশংসা কৰিছে ।এই পৃথিৱীত ৰতন টাটা নাথাকিলেও মানুহৰ অন্তৰত তেওঁ সদায় জীয়াই থাকিব।
এই ভাইৰেল ভিডিঅ’টো বিভিন্ন ছ’চিয়েল মিডিয়া প্লেটফৰ্মত শ্বেয়াৰ হৈছে। হীৰাৰে নিৰ্মিত প্ৰয়াত ৰতন টাটাৰ এই ছবিখন দেখি সকলোৱে আচৰিত হয়। ইয়াৰ সৃষ্টি কৰা ব্যৱসায়ী তথা শিল্পী বিপুলভাই জেপিৱালাক ৰাইজে প্ৰশংসা কৰিছে। একে সময়তে এই প্ৰতিকৃতিখন দেখাৰ পিছত বহু লোকে ৰতন টাটাক স্মৰণ কৰি অতি আৱেগিক হৈ পৰিছে আৰু কমেন্ট কৰি তেওঁক শ্ৰদ্ধাঞ্জলি জ্ঞাপন কৰিছে।
Continue Reading
