১২৫ বছৰীয়া যোগ গুৰু স্বামী শিৱানন্দলৈ পদ্মশ্ৰী সন্মান; প্ৰধানমন্ত্ৰীয়ে দোৱালে মূৰ

ডিজিটেল ডেস্কঃ দিল্লীত ৰাষ্ট্ৰপতি ভৱনত কাশীৰ যোগ গুৰু স্বামী শিৱানন্দক পদ্মশ্ৰী সন্মানেৰে অলংকৃত কৰা হয়। ১২৫ বছৰীয়া স্বামী শিৱানন্দই যেতিয়া সন্মান গ্ৰহণ কৰিবলৈ উপস্থিত হয়, দৰবাৰ হলত সকলোৱে তেওঁক হাতচাপৰিৰে অভিবাদন জনায়। প্ৰধানমন্ত্ৰী নৰেন্দ্ৰ মোদীয়েও মূৰ দোৱাই তেওঁক সন্মান জনায়। যোগৰ ক্ষেত্ৰত আগবঢ়োৱা উৎকৃষ্ট অৱদানৰ বাবে স্বামী শিৱানন্দক পদ্মশ্ৰী সন্মান প্ৰদান কৰা হয়। উল্লেখ্য যে ১২৫ বছৰ বয়সতো স্বামী শিৱানন্দই পদ্মশ্ৰী সন্মান গ্ৰহণ কৰিবলৈ দিল্লীত নিজে উপস্থিত হয়। যোগ আৰু পৰিশীলিত জীৱনশৈেলীৰ বাবে তেওঁ এই বয়সতো সম্পূৰ্ণ সুস্থ হৈ আছে। যোগগুৰু হিচাপে পৰিচিত স্বামী শিৱানন্দৰ জন্ম ৮ আগষ্ট ১৮৯৬ত চিলেট জিলাৰ হৰীপুৰ গাঁৱত হৈছিল, যি এতিয়া বাংলাদেশৰ অধীনত।দেশৰ স্বাধীনতাৰ সময়ত তেওঁৰ বয়স আছিল ৫০ বছৰ। স্বামী শিৱানন্দই কয় যে যোগ, প্ৰাণায়াম আৰু ঘৰুৱা চিকিৎসাই হৈছে তেওঁ সুস্থ হৈ থকাৰ মূলমন্ত্ৰ। তেওঁ দৈনিক পুৱা ৩ বজাত শোৱাৰ পৰা উঠে আৰু যোগাসন কৰে। লগতে তেওঁ নিয়মিত শ্ৰীমদ্ভাগৱত গীতা পাঠ কৰে। স্বামী শিৱানন্দই সিদ্ধ খাদ্য গ্ৰহণ কৰে। শিৱানন্দ সৰস্বতী নামেৰেও জনাজাত স্বামী শিৱানন্দ। বহু কম বয়সতে তেওঁ পিতৃ–মাতৃ আৰু ভগ্নীক হেৰুৱাইছিল। যোগৰ শিক্ষা গ্ৰহণ কৰাৰ পিছত নিজৰ গুৰুৰ নিৰ্দেশত তেওঁ ৩৪ বছৰ সময় বিশ্বৰ বিভিন্ন দেশ ভ্ৰমণ কৰে। সহজ–সৰল জীৱনৰ ওপৰত গভীৰ আস্থা ৰখা স্বামী শিৱানন্দই নিজকে জাক–জমকতাৰ পৰা দূৰত ৰাখে। স্বামী শিৱানন্দক বহু লোকে আদৰ্শ হিচাপে লৈ যোগ ক্ষেত্ৰখনলৈ আগুৱাই আহিছে আৰু নিজকে সুস্বাস্থ্যৱান কৰি ৰখাৰ প্ৰেৰণা লাভ কৰিছে। আৰু পঢ়কঃ ২২ মাৰ্চৰ দিনটোত কি আছে আপোনাৰ ভাগ্যত…চাওক ৰাশিফল