১২বছৰে শ্বাসকষ্টত আছিল এইগৰাকী লোক, নাকৰ ফুটা বন্ধ কৰি গজিল দাঁত

ডিজিটেল ডেস্ক: আশ্বৰ্যজনক! এজন ব্যক্তিৰ নাকৰ ভিতৰত ওলাল দাঁত ৷ উল্লেখ্য যে, ১২বছৰ ধৰি শ্বাস-প্ৰশ্বাসৰ সমস্যাত ভুগি আছিল ব্যক্তিজনে৷ অৱশেষত চিকিৎসকৰ কাষ চাপে ব্যক্তিজন৷ কিন্তু বহু পৰীক্ষা-নিৰীক্ষাৰ পাছত অৱশেষত ওলাল ওৰহীৰ ওৰ৷ তেওঁৰ সোঁ-নাকৰ ভিতৰত চিকিৎসকে আৱিষ্কাৰ কৰিলে এটি দাঁতৰ বাঢ়ি অহা অংশ৷ ৩৮ বছৰীয়া যুৱকজনে পৰীক্ষকসকলক কৈছিল যে, এই অৱস্থাৰ বাবে তেওঁৰ মুখমণ্ডলৰ কোনো আঘাত বা অস্বাভাৱিকতা নাই৷ ৰাইন’স্কোপীৰ জৰিয়তে এই বিৰল ৰোগটো ধৰা পৰিছিল। পৰীক্ষাটোৱে প্ৰকাশ কৰিছিল যে অস্বাভাৱিকভাৱে তেওঁৰ সোঁ-নাকত এটা দাঁত বাঢ়ি আহিছিল। অস্বাভাৱিক ঘটনাটোৰ বিৱৰণ কৰিছিল চিকিৎসক সাগৰ খান্না আৰু চিকিৎসক মাইকেল টাৰ্ণাৰে৷ চিকিৎসকে যুটীয়াভাৱে কৈছিল যে, ‘নাকৰ শাৰীৰিক পৰীক্ষাত চেপ্টেল বিচ্যুতি, কেলচিফাইড চেপ্টেল স্পাৰ, আৰু পিছফালৰ চেপ্টামত ২ চেঃমিঃ ছিদ্ৰ দেখা গৈছিল। ৰাইন’স্কোপীৰ ক্ষেত্ৰত, সোঁ-নাকত এক কঠিন বগা ভৰ দেখা গৈছিল৷’ মৌখিক আৰু অ’টোলেৰিংগোলজিক অস্ত্ৰোপচাৰৰ সময়ত দাঁতটো নাকৰ পৰা এক অন্তঃনাসিক পদ্ধতিৰ জৰিয়তে আঁতৰ কৰা হৈছিল। চিকিৎসকসকলৰ মতে, ইয়াৰ দৈৰ্ঘ্য আছিল ১৪ মিঃমিঃ। অস্ত্ৰোপচাৰৰ তিনি মাহৰ পাছত যুৱকজনৰ নাকৰ সকলো সমস্যাৰ সমাধান হৈছিল।