পাচলিৰ আঁৰত গৰুৰ চোৰাং ব্যৱসায়! বিহালীত আৰক্ষীৰ জালত ১৩টা গৰুসহ দুই সৰবৰাহকাৰী

ডিজিটেল ডেস্ক: অবৈধ গৰু সৰবৰাহকাৰী চক্ৰই আৰক্ষীৰ চকুত ধূলি দিবলৈ নিতৌ ৰচনা কৰিছে ন-ন কৌশল। কেতিয়াবা যদি পৰ্দা আঁৰি যাত্ৰীবাহী বাছত, কেতিয়াবা আকৌ বিলাসী স্কৰপিঅ’ বাহন কিম্বা তেলৰ টেংকাৰত গৰু সৰবৰাহৰ চেষ্টা চলাইছে চোৰাং ব্যৱসায়ীয়ে। কিন্তু এইবাৰ বিহালীত পোহৰলৈ আহিল এক জঘন্য তথা অভিনৱ কৌশল। এখন মালবাহী বাহনত চাৰিওফালে ৰঙালাও আৰু মাজত ১৩ টা গৰু অবৈধভাৱে সৰবৰাহ কৰা অৱস্থাত বিহালী আৰক্ষীয়ে চালক সহ দুজনক আটক কৰিবলৈ সক্ষম হৈছে।

জানিব পৰা মতে, বিহালী আৰক্ষী থানাৰ অন্তৰ্গত বেদেতী চেণ্টাৰত আৰক্ষীয়ে নিয়মীয়া নাকা চেকিং চলাই আছিল। সেই সময়তে এক গোপন সূত্ৰৰ পম খেদি আৰক্ষীৰ দলটোৱে এখন সন্দেহযুক্ত মালবাহী বাহন ৰখায়। প্ৰথম দৃষ্টিত বাহনখনত কেৱল ৰঙালাও ভৰ্তি হৈ থকা যেন লাগিছিল। কিন্তু ভালদৰে তালাচী চলোৱাত আৰক্ষীৰ চকু কপালত উঠে।

চোৰাং সৰবৰাহকাৰী কেইজনে বাহনখনৰ চাৰিওফালে ৰঙালাওৰ এক আৱৰণ দি মাজৰ অংশত অতি কৌশলৰে ১৩ টা গৰু লুকুৱাই ৰাখিছিল। আৰক্ষীয়ে লগে লগে গৰু কেইটা জব্দ কৰাৰ লগতে বাহনখনৰ চালকসহ দুজন লোকক আটক কৰিবলৈ সক্ষম হয়।

ধৃত লোক দুজনৰ প্ৰাথমিক স্বীকাৰোক্তি অনুসৰি, জব্দকৃত গৰু আৰু ৰঙালাওখিনি চিমেণ্ট চাপৰিৰ পৰা নগাঁও জিলাৰ চামগুৰিলৈ লৈ যোৱাৰ পৰিকল্পনা আছিল।

বৰ্তমান বিহালী আৰক্ষীয়ে আটকাধীন সৰবৰাহকাৰী দুয়োকে থানাত ৰাখি তীব্ৰ সোধপোচ অব্যাহত ৰাখিছে আৰু এই সমগ্ৰ অবৈধ চক্ৰটোৰ সৈতে আন কোন কোন জড়িত আছে, তাৰ সন্ধান উলিয়াবলৈ তদন্ত ক্ষিপ্ৰতৰ কৰি তুলিছে।