ডিজিটেল ডেস্ক: ৰাজ্যত পুনৰ সংঘটিত হৈছে আৰক্ষীৰ এনকাউণ্টাৰৰ ঘটনা। এইবাৰ আৰক্ষীৰ গুলীত নিহত হৈছে হত্যাকাৰী আছিফ খান ওৰফে ৰোজ আলী। কালি নলবাৰীত সদৌ অসম ছাত্ৰ সন্থা (আছু)ৰ নেতা মাধুৰ্য বৰ্মনক নৃশংসভাৱে হত্যা কৰা আৰু মৃদুমুদ্ৰা ডেকা নামৰ যুৱতীগৰাকীক গুৰুতৰভাৱে আঘাতপ্ৰাপ্ত কৰাৰ মূল অভিযুক্ত আছিল এই আছিফ খান।
আৰক্ষীৰ এক সূত্ৰই জনোৱা মতে, আছু নেতা মাধুৰ্য বৰ্মনৰ হত্যাকাণ্ডৰ পিছৰে পৰা হত্যাকাৰী আছিফ খান ওৰফে ৰোজ পলাতক হৈ আছিল। অৱশেষত আৰক্ষীয়ে গোপন সূত্ৰৰ পম খেদি মুকালমুৱা চৰত ৰোজে আত্মগোপন কৰি থকাৰ খবৰ লাভ কৰে। সেই অনুসৰি আৰক্ষীৰ এটা দলে চৰ অঞ্চলটোত অভিযান চলায়।
অভিযানকাৰী দলটোক দেখা পাই অপৰাধী ৰোজে আৰক্ষীৰ ওপৰত আক্ৰমণ কৰাৰ চেষ্টা চলায়। নিজৰ আত্মৰক্ষাৰ বাবে আৰু অপৰাধীক কৰায়ত্ত কৰিবলৈ আৰক্ষীয়ে বাধ্য হৈ গুলীচালনা কৰে। আৰক্ষীয়ে প্ৰথমতে ৰোজৰ ভৰিলৈ লক্ষ্য কৰি গুলী বৰ্ষণ কৰিছিল যদিও গুলী থিতাতে ৰোজৰ দেহত লাগে আৰু তেওঁ গুৰুতৰভাৱে আহত হয়।
এনকাউণ্টাৰৰ পিছত আৰক্ষীয়ে ততাতৈয়াকৈ আছিফ খানক নলবাৰী চিকিৎসা মহাবিদ্যালয় হাস্পতাললৈ ৰেফাৰ কৰে। কিন্তু দুৰ্ভাগ্যবশতঃ, হাস্পতাল পোৱাৰ পূৰ্বেই অৰ্থাৎ বাটতে আছিফ খান ওৰফে ৰোজৰ মৃত্যু ঘটে। হাস্পতালৰ চিকিৎসকে ৰোজ আলীক মৃত ঘোষণা কৰে।
উল্লেখযোগ্য যে, এই কুখ্যাত অপৰাধী ৰোজৰ বৰ্বৰ আক্ৰমণৰ চিকাৰ হৈ অকাল মৃত্যুক সাৱটি ল’বলগা হৈছিল উদীয়মান আছু নেতা মাধুৰ্য বৰ্মনে। আনহাতে, একেটা আক্ৰমণতে গুৰুতৰভাৱে আহত হোৱা মৃদুমুদ্ৰা ডেকা নামৰ যুৱতীগৰাকী বৰ্তমানো গুৱাহাটী চিকিৎসা মহাবিদ্যালয় হাস্পতালত (GMCH) চিকিৎসাধীন হৈ আছে আৰু জীৱন-মৃত্যুৰে যুঁজিছে। চৰকাৰী এনকাউণ্টাৰৰ এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
উল্লেখ্য যে ৩১ মে'ৰ সন্ধিয়া মাধুৰ্য বৰ্মন তেওঁৰ মাহীয়েকৰ জীয়েক মৃদুমুদ্ৰাৰ সৈতে স্কুটাৰেৰে ঘৰলৈ উভতি অহাৰ সময়ত গংগাপুৰত দুৰ্বৃত্তই চোকা অস্ত্ৰৰে তেওঁলোকক আক্ৰমণ কৰে। আক্ৰমণকাৰীজনৰ হাতৰ পৰা ভনীয়েকক বচাবলৈ যাওঁতেই মাধুৰ্যই প্ৰাণ হেৰুৱায়। ৰোজ আলীয়ে মৃদুমুদ্ৰাক প্ৰেমৰ প্ৰস্তাৱ দি আহিছিল আৰু মৃদুমুদ্ৰাই সেই প্ৰেমৰ প্ৰস্তাৱ প্ৰত্যাখান কৰা বাবেই এই নৃশংস হত্যাকাণ্ড সংঘটিত হয়। এই লাভ জেহাদৰ ঘটনাই কঁপাই গৈছে সমগ্ৰ অসম।
Continue Reading
