১৩৮ৰ মৃত্যু, ৯০হাজাৰক স্থানান্তৰ : কৰ’নাৰ মাজতে মহাৰাষ্ট্ৰত নতুন বিপৰ্যয়

মুম্বাই : কৰ’না সংকটৰ মাজতে দেশৰ ভিতৰতে সৰ্বাধিক ক্ষতিগ্ৰস্ত ৰাজ্য মহাৰাষ্ট্ৰত আন এক বিপৰ্যয়ৰ সূচনা হৈছে। মহাৰাষ্ট্ৰত প্ৰবল বৃষ্টিপাতৰ ফলত সৃষ্টি হোৱা বিপৰ্যয় অধিক গাঢ় হৈছে। বৰষুণসৃষ্ট দুৰ্যোগে ৰাজ্যখনত এতিয়ালৈ কমেও ১৩৮জন লোকৰ প্ৰাণ কাঢ়িছে। ৰাজ্যখনৰ কেইবাঠাইতো হোৱা ভূমিস্ফলনৰ ফলত মৃত্যু হৈছে বহুসংখ্যক লোকৰ। উপকূলীয় ৰায়গড় জিলাত ভূমিস্খলৰ ফলত মৃত্যু হোৱা ৩৬জন লোককে ধৰি এই বৃহৎসংখ্যক লোকে প্ৰাণ হেৰুৱাইছে ৰাজ্যখনত।

মূলতঃ কোংকন এলেকাৰ ভালেকেইখন জিলাত বিগত কেইবাদিনো ধৰি হোৱা প্ৰৱল বৃষ্টিপাতে তীব্ৰ সংকটৰ সৃষ্টি কৰিছে। বান আৰু ভূমিস্খলৰ ফলতে ক্ষতিগ্ৰস্ত হৈছে হাজাৰ হাজাৰ লোক। মহাৰাষ্ট্ৰৰ সাহায্য আৰু পুনৰসংস্থাপন বিভাগৰ মন্ত্ৰী বিজয় ৱাডেত্তিৱাৰে প্ৰকাশ কৰিছে যে, বৰষুণ সৃষ্ট দুৰ্যোগে ১৩৮জন লোকৰ প্ৰাণ কাঢ়িছে। ৰাজ্যখনৰ ছাতাৰা জিলাতো বৰষুণে প্ৰলয়ৰ সৃষ্টি কৰিছে আৰু বহু লোক বানৰ সোঁতত উটি যোৱাৰ বাতৰি পোৱা গৈছে। ছাতাৰাত বানৰ কৱলত পৰি মৃত্যু হোৱা লোকৰ সংখ্যা ২৭জন হোৱাৰ কথা প্ৰশাসনৰ এক সূত্ৰই প্ৰকাশ কৰিছে।

আনহাতে গোণ্ডীয়া আৰু চন্দ্ৰপুৰ জিলাতো প্ৰাণহানিৰ খবৰ আহিছে। বানত ক্ষতিগ্ৰস্ত প্ৰায় ৯০ হাজাৰ লোকক এতিয়ালৈ নিৰাপদ স্থানলৈ স্থানান্তৰ কৰা হৈছে। কেৱল কোলহাপুৰ জিলাৰে ৪০ সহস্ৰাধিক লোকক স্থানান্তৰ কৰিবলগীয়া হৈছে। জিলাখনৰ ৫৪খন গাঁও সম্পূৰ্ণৰূপে আৰু আন ভালেমান গাঁও আংশিকভাৱে বানত ক্ষতিগ্ৰস্ত হৈছে। কৰ’না সংকটে জুৰুলা কৰা মহাৰাষ্ট্ৰত বানৰ এই বিপৰ্যয় একপ্ৰকাৰ ভূত ওপৰত দানহ পৰাৰ লেখীয়া হৈছেগৈ।