ৰাজ কুন্দ্ৰা নিৰ্দোষী! সপক্ষত কি যুক্তি দিলে পত্নী শিল্পা শেট্টীয়ে?

মুম্বাই : ৰাজ কুন্দ্ৰা নিৰ্দোষী। তেওঁ কোনো ধৰণৰ পৰ্ণ ভিডিঅ’ নিৰ্মাণৰ লগত জড়িত নাছিল। এই দাবী কৰিছে দেশত ব্যাপক চৰ্চা লাভ কৰা পৰ্ণ ৰেকেট কেলেংকাৰিৰ অভিযুক্ত ৰাজ কুন্দ্ৰাৰ পত্নী তথা তাৰকা অভিনেত্ৰী শিল্পা শেট্টীয়ে। ‘হটশ্বট’ নামৰ যিটো এপক কেন্দ্ৰ কৰি এই চাঞ্চল্যকৰ ঘটনা পোহৰলৈ আহিছে সেই এপটোৰ সৈতে তেওঁৰ কোনো ধৰণৰ সম্পৰ্ক নাই বুলিও দাবী কৰে অভিনেত্ৰীগৰাকীয়ে।

উল্লেখ্য যে, এই সপ্তাহৰ আৰম্ভণিতে মুম্বাইৰ আৰক্ষীৰ অপৰাধ শাখাই ব্যৱসায়ী ৰাজ কুন্দ্ৰাক গ্ৰেপ্তাৰ কৰিছিল। তেওঁৰ বিৰুদ্ধে পৰ্ণ ভিডিঅ’ নিৰ্মাণ, প্ৰচাৰ তথা এনে ভিডিঅ’ত ভাগ লোৱাৰ বাবে বিভিন্নজনক প্ৰৰোচিত কৰাৰ দৰে অভিযোগ উত্থাপন কৰা হৈছিল। তেওঁ এতিয়াও আৰক্ষীৰ জিম্মাতে আছে। শুকুৰবাৰে এই গোচৰ সংক্ৰান্ততে মুম্বাই আৰক্ষীয়ে অভিনেত্ৰীগৰাকীক জেৰা কৰিছিল। এই বিষয়টো সম্পৰ্কত তথ্যৰ সম্ভেদ পোৱা লোকে প্ৰকাশ কৰিছে যে, অভিনেত্ৰীগৰাকীয়ে তেওঁৰ স্বামীৰ নিৰ্দোষিতাৰ দাবী কৰিছে।

তেওঁ লগতে প্ৰকাশ কৰিছে যে, ‘হটশ্বট’ত এপৰ জৰিয়তে প্ৰকাশ কৰা ভিডিঅ’বোৰ যৌনগন্ধী হ’লেও ই পৰ্ণ’গ্ৰাফী নহয় বা ইয়াৰ চৰিত্ৰ পৰ্ণ’গ্ৰাফীতকৈ বেলেগ। শিল্পাই এই এপৰ কণ্টেণ্ট আৰু এই এপটো চলোৱাৰ বাবে প্ৰদীপ বাকছী নামৰ মোষ্ট ৱাণ্টেড অভিযুক্ত আৰু লণ্ডনত থকা কুন্দ্ৰাৰ এগৰাকী আত্মীয়হে দায়ী বুলি মন্তব্য কৰিছে। ইফালে, মুম্বাইৰ এখন আদালতে অহা মঙলবাৰলৈ ৰাজ কুন্দ্ৰা আৰু ৰিয়ান থৰ্পৰ আৰক্ষীৰ জিম্মাৰ ম্যাদ বৃদ্ধি কৰিছে। ধনাঢ্য ব্যৱসায়ীজনে ইতিমধ্যে তেওঁৰ গ্ৰেপ্তাৰক প্ৰত্যাহ্বান জনাই উচ্চ ন্যায়ালয়ৰ কাষ চাপিছে। তেওঁৰ অধিবক্তাইও যি ভিডিঅ’ৰ আধাৰত কুন্দ্ৰাক গ্ৰেপ্তাৰ কৰা হৈছে, সেইবোৰ ভিডিঅ’ অশ্লীল হ’লেও পৰ্ণ’গ্ৰাফিক নহয় বুলি দাবী কৰিছিল।