তিনি মাহত খাদ্যৰ বাবে অপেক্ষাৰত ১৪০০ পেলেষ্টাইনীক হত্যা

ডিজিটেল ডেস্ক : গাজাত খাদ্যৰ বাবে অপেক্ষাৰত পেলেষ্টাইনীৰ হত্যাযজ্ঞ চলায়েই আছে ইজৰাইলী সেনাই। ৩০ আৰু ৩১ জুলাইত গাজাত ইজৰাইলী সেনাই ১০৫জন খাদ্যৰ বাবে অপেক্ষা কৰি থকা পেলেষ্টাইনীক হত্যা কৰে আৰু সাত শতাধিক লোকক আহত কৰে।

উত্তৰ গাজা, দক্ষিণ খান ইউনুছ আৰু মধ্য গাজা আৰু ৰাফাহত ইজৰাইলী সামৰিক বাহিনীয়ে দেওবাৰে আক্ৰমণ চলাই ৪০জন পেলেষ্টাইনীক হত্যা কৰে। গাজাৰ খাদ্য বিতৰণ কেন্দ্রসমূহক হামাছে নিজৰ নিয়ন্ত্ৰণলৈ অনা বুলি অভিযোগ কৰি ইজৰাইলী সেনাই এই পেলেষ্টাইনী হত্যাযজ্ঞ চলাই আছে। যোৱা ২৭মে'ৰ পৰা প্ৰায় ১৪০০ পেলেষ্টাইনীক ইজৰাইলী সেনাই হত্যা কৰিছে।

ইফালে, গাজাত দুর্ভিক্ষ আৰম্ভ হোৱাৰ বাতৰি প্ৰচাৰ হোৱাৰ সময়তে শনিবাৰে ইজৰাইলী সেনাই দাবী কৰে যে গাজাত দুর্ভিক্ষৰ সৃষ্টি হোৱা নাই। শনিবাৰে ইজৰাইলী সেনাই কয় যে ছখন দেশে পঠিওৱা মানৱীয় সাহায্য ইজৰাইলে বিমানৰ পৰা পেলেষ্টাইনীসকলক যোগান ধৰে। ইফালে, কেইবাখনো ইউৰোপীয় দেশে গাজাত দুর্ভিক্ষ হোৱাৰ বাবে ইজৰাইলক জগৰীয়া কৰি বিবৃতি জাৰি কৰিছে। আনহাতে, আৰবীয় দেশসমূহেও হামাছক অস্ত্র সম্বৰণ কৰিবলৈ আহবান জনাইছে।

উৎসঃ দৈনিক জনমভূমি