জলজীৱন আঁচনিৰ কাম সম্পূৰ্ণ কৰিও নাপালে প্ৰাপ্য ধন, ৰাজ্যত ১৪ হাজাৰ ঠিকাদাৰৰ হাহাকাৰ

ডিজিটেল ডেস্ক: অসম চৰকাৰৰ বহু অভিলাষী জলজীৱন মিছন আঁচনি এতিয়া ধোঁৱাচাঙত। সমগ্র অসমত বিয়াল্লিছটা উপ-সংমণ্ডলত অসমৰ বিভিন্ন প্রান্তত কোটি কোটি টকাৰে নিৰ্মাণ কৰা জলজীৱন মিছন আঁচনিৰ পৰা জনসাধাৰণে প্ৰকৃততে কিমান উপকৃত হ'ল ই এক কোটিটকীয়া প্রশ্ন। ঘৰে ঘৰে নল হ'ল যদিও অসমত ঘৰে ঘৰে জল আজিও নহ'ল। 

ঠিকাদাৰে বিভিন্ন উৎসৰ পৰা ঋণ লৈ অসম চৰকাৰৰ বহু অভিলাষী আঁচনিৰ কাম সম্পূৰ্ণ কৰিও আজিও লাভ নকৰিলে নিজৰ প্ৰাপ্য ধন। সদৌ অসম জনস্বাস্থ্য কাৰিকৰী ঠিকাদাৰ সন্থাই দৈনিক জনমভূমিক জানিবলৈ দিয়া মতে ২০২৪ চনৰ অক্টোবৰ মাহৰ পৰাই এক পইচাও প্রাপ্য ধন লাভ নকৰাৰ অভিযোগ উঠিছে। নতুন নতুন জে জে এমৰ গাইড লাইন প্ৰস্তুত কৰি ঠিকাদাৰক প্ৰাপ্য ধনৰ পৰা বঞ্চিত কৰি আহিছে বুলি আন এক অভিযোগ আনিছে। 

সন্থাটোৱে জানিবলৈ দিয়া মতে, ঠিকাদাৰে বিনিয়োগ কৰা সত্তৰ শতাংশ ধন মোকলাই দিয়াৰ আৱেদন-নিৱেদন কৰি আহিছে যদিও কৌশলেৰে চৰকাৰে ঠিকাদাৰসকলক বঞ্চিত কৰি ৰখাৰো অভিযোগ উঠিছে। সঠিকভাৱে ৰূপায়ণ হোৱা জলজীৱন মিছন আঁচনিৰ কাম সম্পূৰ্ণ হৈ উঠাৰ পাছতো ঠিকাদাৰে গৰিষ্ঠসংখ্যক ধন আজিও লাভ নকৰাত পানীত হাঁহ নচৰা অৱস্থাৰ সৃষ্টি হৈছে পৰিয়ালত। 

কষ্টোপার্জিত আৰু ঋণ লোৱা ধন জলজীৱন আঁচনিত বিনিয়োগ কৰি ঠিকাদাৰসকলে ঘূৰাই নোপোৱাত মূৰে-কপালে হাত দিব লগা অৱস্থা হৈছে। ঠিকাদাৰ সন্থাটোৱে ৰজা ঘৰৰ মন্ত্ৰী মহোদয়ক লগ কৰাৰ লগতে বিভাগীয় কর্তৃপক্ষৰ লগত যোগাযোগ ৰক্ষা কৰি লাভ কৰা নাই নিজৰ পাপ্যৰ ধন। 

সদৌ অসম জনস্বাস্থ্য কাৰিকৰী ঠিকাদাৰ সন্থাই বিভাগীয় কর্তৃপক্ষৰ পৰা বাৰ লাখ কোটিৰো অধিক টকা আদায় নিদিয়াত ঠিকাদাৰসকল নানা সমস্যা হৈ আহিছে বুলি সন্থটোৱে এই প্রতিবেদকক জানিবলৈ দিছে। নিজৰ পাপ্য ধন বিচাৰি সন্থাটোৱে ৰজাঘৰৰ কার্যালয়লৈ গৈ গৈ ভাগৰি পৰা বুলি দৈনিক জনমভূমিক জানিবলৈ দিছে। নিজৰ প্ৰাপ্য ধন বিচাৰি সন্থাটোৱে চাৰিবাৰকৈ চৰকাৰৰ দৃষ্টিগোচৰ হোৱাকৈ আন্দোলন কৰিও সফল নোহোৱাত নিজৰ কষ্টোপার্জিত ধন ঘূৰাই নোপোৱাৰ ভয়ত এতিয়া কম্পমান হৈছে। কষ্টোপার্জিত ধন মোকলাই নিদিয়াত ইতিমধ্যে দুজনে চিকিৎসাৰ অভাৱত আৰু দুজনে আত্মহত্যা কৰিছে বুলি সন্থাটোৱে সদৰী কৰিছে। 

প্ৰধানমন্ত্ৰীলৈ পত্ৰ প্ৰেৰণ কৰিও সন্থাটোৱে একো সদুত্তোৰ নোপোৱাত এতিয়া হুমুনিয়াহ কাঢ়িছে। সদৌ অসম জনস্বাস্থ্য কাৰিকৰী ঠিকাদাৰ সন্থই বিষয়টো চালি-জাৰি চাই এক যোগাত্মক পদক্ষেপ গ্রহণ কৰিবলৈ বিভাগীয় কৰ্তৃপক্ষৰ লগতে চৰকাৰক আহ্বান জনাইছে।

উৎসঃ দৈনিক জনমভূমি