ডিজিটেল
ডেস্ক : ভাৰতৰ স্বাধীনতা দিৱস ১৫ আগষ্ট সমাগত৷ স্বাধীনতা দিৱসত দেশত হ’ব পৰা কুটিঘাতমূলক ঘটনাক প্ৰতিৰোধ কৰিবলৈ এতিয়া সম্পূৰ্ণৰূপে সাজু হৈ উঠিছে দিল্লী আৰক্ষী৷ কটকটীয়া নিৰাপত্তাৰ মাজত লালকিল্লাত উদযাপন কৰা হ’ব স্বাধীনতা দিৱসৰ বিভিন্ন কাৰ্যসূচী ৷ বিভিন্ন সন্ত্ৰাসবাদী সংগঠনৰ ভাবুকি তথা কূটাঘাতমূলক ঘটনা ৰোধ কৰিবলৈ লালকিল্লাত দিল্লী আৰক্ষী ১০০০ তকৈয়ো অধিক ইন্টাৰনেট প্ৰ’টকল জড়িত চি চি টিভি কেমেৰা মোতায়েন কৰিছে।
দেশৰ ৭৫ সংখ্যক স্বাধীনতা দিৱস উদযাপনৰ সময়ত লস্কৰ -ই-তৈবা আৰু জৈছ -ই-মহম্মদৰ ফালৰ পৰা কোনো ভাবুকি আহিব পাৰে বুলিও ইন্টেলিজেন্স ব্যুৰোয়ে সাৱধান বাণী শুনাইছে৷ কিছুদিন পূৰ্বে জাপানৰ প্ৰধানমন্ত্ৰী শ্বিনজো আবেৰ এখন ৰাজহুৱা সভাত ভাষণ দি থকা অৱস্থাত হত্যা হৈছিল৷ এনে ঘটনা ভাৰততো সংঘটিত হোৱাৰ আশংকাত শংকিত হৈ পৰিছে দিল্লী আৰক্ষী৷ ইতিমধ্যে দিল্লী আৰক্ষীক ইন্টেলিজেন্স ব্যুৰোয়ে দহ পৃষ্ঠাৰ এখন ৰিপ’ৰ্ট কাৰ্ড প্ৰেৰণ কৰিছে।
নিউ দিল্লী জিলা, উত্তৰ দিল্লী, দক্ষিণ -পূব আৰু কেন্দ্ৰীয় দিল্লীতো চি চি টিভি কেমেৰাৰ মোতায়েন কৰা হৈছে৷তদুপৰি লালকিল্লাক আগুৰি থকা দিল্লীৰ উত্তৰ আৰু কেন্দ্ৰ অংশত সুৰক্ষা ব্যৱস্থা অধিক কটকটীয়া কৰি তোলা হৈছে৷ এই কেমেৰা সমূহ উচ্চ ক্ষমতাসম্পন্ন বুলি জানিব পৰা গৈছে।
Continue Reading
