১৫০খন গাঁৱক লৈ বিশেষ পদক্ষেপ কেন্দ্ৰৰ, সহযোগী ইজৰাইল; জানক সবিশেষ

ডিজিটেল ডেস্ক: ভাৰতৰ বাবে সহায়ৰ হাত আগবঢ়াইছে ইজৰাইলে৷ ইজৰাইলৰ কাৰিকৰী সহায়ত ভাৰতৰ ১৫০ খন গাঁও ৰূপান্তৰ হ’ব ‘আদৰ্শ গাঁৱ'লৈ৷ ভাৰতৰ কেন্দ্ৰীয় কৃষিমন্ত্ৰী নৰেন্দ্ৰ সিং তোমৰে এই কথা সদৰি কৰিছে৷ মন্ত্ৰীগৰাকীৰ তথ্য অনুসৰি, ইজৰাইল চৰকাৰে ভাৰতৰ ১২খন ৰাজ্যত ২৯টা উৎকৰ্ষ কেন্দ্ৰ স্থাপন কৰিছে৷ যিসমূহ কেন্দ্ৰই ২৫ নিযুতৰো অধিক পাচলি প্ৰকল্পৰ লগতে ৩,৮৭,০০০ৰো অধিক ফল উৎপাদন কৰি আছে৷ লগতে, এই কেন্দ্ৰসমূহৰ অধীনত প্ৰতি বছৰে ১ লাখ ২০ হাজাৰৰো অধিক কৃষকক প্ৰশিক্ষণ দিয়া হ’ব৷ ইজৰাইলে স্থাপন কৰা এই কেন্দ্ৰসমূহৰ চাৰিওফালে অৱস্থিত ১৫০খন গাঁৱকেই আদৰ্শ গাঁওলৈ ৰূপান্তৰ কৰা হ’ব। কেন্দ্ৰীয় কৃষিমন্ত্ৰী নৰেন্দ্ৰ সিং তোমৰে ২৭ জানুৱাৰীত ইজৰাইলৰ ৰাষ্ট্ৰদূত নাওৰ গিলনৰ সৈতে এক বৈঠকত কয়, ভাৰতৰ স্বাধীনতাৰ ৭৫সংখ্যক বৰ্ষক স্মৰণ কৰিবলৈ প্ৰথম বছৰত ৭৫খন গাঁও হাতত লোৱা হৈছে, য’ত ভাৰত আৰু ইজৰাইলে একেলগে কাম কৰিব। ভাৰত আৰু ইজৰাইলৰ মাজত ৩০ বছৰীয়া কূটনৈতিক সম্পৰ্ক সম্পূৰ্ণ হোৱাত আনন্দ প্ৰকাশ কৰি মন্তব্য কৰাৰ লগতে কেন্দ্ৰীয় চৰকাৰ ২৯টা উৎকৰ্ষ কেন্দ্ৰৰ কাম-কাজত সন্তুষ্ট বুলি এক চৰকাৰী বিবৃতিযোগেও প্ৰকাশ কৰিছে। ইজৰাইলৰ ৰাষ্ট্ৰদূত গিলনে কয়, এই কেন্দ্ৰবোৰ দুয়োখন দেশৰ মাজত সহযোগিতাৰ এক উৎকৃষ্ট উদাহৰণ আৰু কৃষকসকলক প্ৰদান কৰা সেৱাৰ মান আৰু অধিক উন্নত কৰাৰ বাবে কেন্দ্ৰসমূহৰ বাবে প্ৰমাণপত্ৰৰ প্ৰস্তাৱ দিয়ে। তেওঁ কৃষি-গৱেষণা সংস্থা আইচিএআৰৰ সৈতে অধিক সহযোগিতা আৰু ইজৰাইলৰ সৈতে উপলব্ধ শেহতীয়া প্ৰযুক্তি উপলব্ধ কৰাৰ ক্ষেত্ৰতো আগ্ৰহ প্ৰকাশ কৰে।