২০বছৰীয়া যুৱতীক ধৰ্ষণ-হত্যা, জনহীন আবাসত পেলালে মৃতদেহ, কাৰ এই পৈশাচিক কাৰ্য?

ডিজিটেল ডেস্ক : পুনৰ ধর্ষণ-হত্যাৰ জঘন্য ঘটনাই তুলিছে জোকাৰণি। এগৰাকী ২০বছৰীয়া যুৱতীক ধৰ্ষণ কৰি হত্যা কৰাৰ ঘটনাৰ কথা পোহৰলৈ অহাৰ পাছত তীব্ৰ চাঞ্চল্যৰ সৃষ্টি হৈছে। ধৰ্ষণ কৰি হত্যা কৰাৰ পাছত যুৱতীগৰাকীৰ মৃতদেহ পেলাই থৈ গ’ল খালী আবাসগৃহ এটাত। এই ঘটনা সংঘটিত হৈছে কুৰ্লাত। খালী আবাসগৃহটোৰ চাদৰ লিফট ৰূমৰ ভিতৰত উদ্ধাৰ হৈছিল যুৱতীগৰাকীৰ মৃতদেহ। আৰক্ষীয়ে ঘটনা সন্দৰ্ভত গোচৰ ৰুজু কৰি তদন্ত আৰম্ভ কৰিছে যদিও এতিয়ালৈ অভিযুক্তৰ সন্ধান লাভ কৰা নাই।

যুৱতীগৰাকীৰ মৃতদেহৰ মৰনোত্তৰ পৰীক্ষাৰ পাছত তেওঁ যৌন আতিশয্যৰ বলি হোৱা বুলি প্ৰমাণ হৈছে। কেৱল এয়াই নহয় মৃতদেহত পোৱা গৈছে ভালেমান আঘাতৰ চিন। অৰ্থাৎ পৈশাচিক নিৰ্যাতনেৰে হত্যা কৰা হৈছিল যুৱতীগৰাকীক।

মুম্বাই আৰক্ষীৰ উপ-আয়ুক্ত প্ৰণয় অশোকে জানিবলৈ দিয়া মতে, কেইজনমান যুৱকে খালী অট্টালিকাটোত ভিডিঅ' শ্বুটিঙৰ বাবে আহোঁতে তেজেৰে তুমৰলি ২০বছৰীয়া যুৱতীগৰাকীৰ মৃতদেহটো দেখা পায়। আৰক্ষীয়ে ইতিমধ্যে আবাসগৃহটোৰ চিচিটিভি ফুটেজো পৰীক্ষা কৰিছে। আৰক্ষীয়ে প্ৰকাশ কৰা মতে যুৱতীগৰাকীৰ মৃতদেহ অৰ্ধগলিত ৰূপ পোৱালৈ চাই কেইবাদিনো আগেয়ে হত্যাকাণ্ড সংঘটিত কৰা বুলি ধাৰণা কৰা হৈছে। ইফালে, এই ঘটনাক লৈ প্ৰতিক্ৰিয়া প্ৰকাশ কৰি বিজেপিয়ে শাসকীয় দলক সমালোচনা কৰিছে। মু্ম্বাইত জংগলৰাজ চলাৰ অভিযোগ তুলিছে বিজেপিয়ে।