ডিজিটেল ডেস্কঃ ইণ্ডোনেছিয়াৰ বালিত সংঘটিত হৈছে এক শোকাৱহ ঘটনা। ২১০ কেজি ওজন ডিঙিত পৰি মৃত্যু হয় এজন ফিটনেছ ট্ৰেইনাৰৰ। জিমত ফিটনেছ ট্ৰেইনাৰগৰাকীয়ে ব্যায়াম কৰি থকা অৱস্থাত সংঘটিত হয় এই দুৰ্ঘটনা।
ইণ্ডোনেছিয়াৰ ৩৩ বছৰীয়া ফিটনেছ ট্ৰেইনাৰ জাষ্টিন বিকিয়ে বাৰবেল এটা তুলিবলৈ চেষ্টা কৰি থকাৰ সময়তে বাৰবেলটো তেওঁৰ ওপৰত পৰি ডিঙি ভাঙি যায়। এই দুৰ্ঘটনা সম্পৰ্কীয় এটা ভিডিঅ’ ছ’চিয়েল মিডিয়াত ভাইৰেল হৈ আছে। এই ভিডিঅ'টোত স্পষ্টকৈ দেখা গৈছে যে জাষ্টিন বিকিয়ে কান্ধত বাৰবেল লৈ স্কুৱেট প্ৰেছ কৰি আছে।
জাষ্টিন বিকিয়ে স্কুৱেট কৰি থকাৰ সময়ত পোনে পোনে থিয় হ’বলৈ অসুবিধা পাইছিল। ওজন ধৰিবলৈ চেষ্টা কৰাৰ লগে লগে বাৰবেলটো ডিঙিৰ পিছফালে পৰিল আৰু তেওঁ মাটিত বাগৰি পৰিল। সেই সময়ত জাষ্টিন বিকিৰ স্পটাৰজনেও ভাৰসাম্য হেৰুৱাই পেলাইছিল। বিকিক এই সময়ত সহায় আগবঢ়োৱা স্পটাৰগৰাকীয়েও এই আকস্মিক ঘটনাত ভাৰসাম্য হেৰুৱাই পিছলৈ পৰে। স্পটাৰ হৈছে সেইজন ব্যক্তি যিয়ে ভাৰোত্তোলনৰ সময়ত ওজন তুলিবলৈ সহায় কৰে।
জাষ্টিন বিকিয়ে ২১০ কেজি ওজন তুলিবলৈ চেষ্টা কৰিছিল। এই দুৰ্ঘটনাৰ বাবে তেওঁৰ ডিঙি ভাঙি যোৱাৰ লগতে হৃদযন্ত্ৰ আৰু হাওঁফাওঁৰ সৈতে জড়িত গুৰুত্বপূৰ্ণ স্নায়ুবোৰত তীব্ৰ হেঁচা পৰে। দুৰ্ঘটনাৰ পাছতে ততাতৈয়াকৈ জাষ্টিন বিকিক চিকিৎসাৰ বাবে চিকিৎসালয়লৈ লৈ যোৱা হয়। অপাৰেচনৰ কিছু সময়ৰ পিছতে তেওঁৰ মৃত্যু হয়।
