ডিজিটেল ডেস্কঃ 'সোনম গুপ্তা বেৱাফা হ্যে', এখন নোটৰ ওপৰত লিখা হৈছিল এই বাৰ্তা। কেইবছৰমান আগতে এই বাৰ্তা ভাইৰেল হৈ পৰিছিল।মানুহৰ মোবাইলে মোবাইলে বাগৰিছিল একেটা বাৰ্তা। শেহতীয়াকৈ, পুনৰ একেটা ঘটনাৰে পুনৰাবৃত্তি হোৱা দেখা গ’ল। এইবাৰ প্ৰেমিকক উদ্দেশ্যি ১০ টকীয়া নোটত প্ৰেমিকাৰ প্ৰেমপত্ৰ। এই ঘটনাৰ পাছত হৈ চৈ লাগিছে ছ'চিয়েল মিডিয়াত।
১০ টকীয়া নোটত লিখা প্ৰেমপত্ৰখনৰ পৰা স্পষ্ট যে, প্ৰেমিকা অৰ্থাৎ যিজনে লিখিছে তেওঁৰ নাম কুসুম আৰু যাক লৈ লিখা হৈছে অৰ্থাৎ প্ৰেমিকৰ নাম বিশাল। কুসুমৰ ঘৰৰ পৰা বিয়া ঠিক কৰা হৈছে। সেয়েহে ১০টকীয়া নোটত প্ৰেমিকলৈ কুসুমৰ প্ৰেমপত্ৰ। কুসুমে লিখিছে, ‘বিশাল ২৬ এপ্ৰিলত মোৰ বিয়া। মোক ঘৰৰ পৰা পলুৱাই লৈ লৈ যোৱা।মই তোমাক ভালপাওঁ।তোমাৰ কুসুম।’
ছ'চিয়েল মিডিয়াত এই প্ৰেমপত্ৰখন ভাইৰেল হোৱাৰ পাছতে কুসুম-বিশালৰ প্ৰেমক পূ্ৰ্ণতা দিবলৈ উঠি-পৰি লাগিছে ছ’চিয়েল মিডিয়া ব্যৱহাৰকাৰী। এতিয়ালৈকে ব্যাপকভাৱে শ্বেয়াৰ হৈছে কুসুমৰ প্ৰেমপত্ৰখন। এফালে যদি কুসুম-বিশালৰ প্ৰেমকাহিনীয়ে একাংশক ভবাই তুলিছে একাংশই আকৌ ইয়াকে আনন্দৰ মাধ্যম হিচাপে লৈছে। এতিয়া কুসুম-বিশালৰ প্ৰেমে পূৰ্ণতা পাব নে নাপায় সেয়া সময়তহে ক’ব পৰা যাব।
