ডিজিটেল ডেস্ক : দেশত সাম্প্ৰদায়িক উত্তেজনাই গা কৰি উঠাৰ সময়তে ৰাজস্থানৰ আলোৱাৰত এটা হিন্দু মন্দিৰ ভঙাক লৈ সৃষ্টি হৈছে উত্তেজনাৰ। এই ঘটনাক লৈ শাসক, বিৰোধীৰ মাজত সংঘাতৰ সূত্ৰপাত হোৱা দেখিবলৈ পোৱা গৈছে। আলোৱাৰ জিলাৰ ‘ছাৰাই মোহাল্লা’ত থকা এটা ৩০০ বছৰীয়া এটা শিৱ মন্দিৰ ভঙাক লৈ ৰাজনৈতিক বাক-বিতণ্ডাৰ সূত্ৰপাত ঘটা দেখিবলৈ পোৱা গৈছে। এই ঘটনাৰ পাছতে নগৰ পঞ্চায়তৰ কাৰ্যবাহী বিষয়া আৰু ছাব ডিভিজনেল মেজিষ্ট্ৰেট তথা ৰাজগড়ৰ বিধায়কৰ বিৰুদ্ধে অভিযোগ দাখিল কৰিছে বিজেপিয়ে।
এই উচ্ছেদ অভিযানৰ এটা ভিডিঅ’ শ্বেয়াৰ কৰি বিজেপি নেতা অমিত মালব্যই শাসকীয় কংগ্ৰেছ দলৰ বিৰুদ্ধে তীব্ৰ বিষোদগাৰ কৰা দেখিবলৈ পোৱা গৈছে। তেওঁ কয় যে, কাৰাউলী আৰু জাহাংগীৰপুৰীক লৈ চকুপানী টোকা আৰু ইয়াত এনেদৰে হিন্দুৰ বিশ্বাসত আঘাত হনাটোৱেই হৈছে কংগ্ৰেছৰ ধৰ্মনিৰপেক্ষতা। তেওঁ আন এটা টুইটত লগতে অভিযোগ কৰে যে, ১৮ এপ্ৰিলত ৰাজস্থানৰ ৰাজগড় চহৰত প্ৰশাসনে কোনো জাননী জাৰি নকৰাকৈ ৮৫ হিন্দু পৰিয়ালৰ ঘৰ আৰু দোকানত বুলড’জাৰ চলাইছিল।
ইফালে, ৰাজস্থানৰ মন্ত্ৰী প্ৰতাপ সিং কাচাৰিয়াই বিজেপিয়ে কৰা দাবীক মিথ্যাচাৰ আখ্যা দিছে। তেওঁ প্ৰতিঅভিযোগ উত্থাপন কৰি কয় যে, ৰাজগড় পৌৰ নিগমৰ মুৰব্বী তথা এগৰাকী বিজেপি নেতাগৰাকীয়েহে মন্দিৰ আৰু ঘৰ উচ্ছেদ কৰাৰ বাবে প্ৰস্তাৱ দিছিল। কাচাৰিয়াৰ নিৰ্দেশতে এই উচ্ছেদ অভিযান চলিছিল অথচ এগৰাকী কংগ্ৰেছ বিধায়কে ইয়াৰ বিৰোধিতাহে কৰি আছিল।
Continue Reading
