৫০০ টকা খুচুৰা কৰিবৰ বাবে কিনিছিল লটাৰী টিকট; কোটিপতি হ'ল দৰিদ্ৰ চিত্ৰকৰ

ডিজিটেল ডেস্কঃ কোৱা হয় কাৰ কেতিয়া ভাগ্য সলনি হয় সেয়া কোনেও ক'ব নোৱাৰে। ভাগ্য চকৰী ভালে ঘূৰিলে ভিক্ষাৰীও ৰজা হয় আৰু ভাগ্যই লগ এৰিলে ৰজাও ভিক্ষাৰী হয়। এজন দৰিদ্ৰ ব্যক্তিৰ হঠাতে কপাল ফুলিল। ব্যক্তিজনে ৫০০ টকা খুচুৰা কৰিবৰ বাবে এটা লটাৰী টিকট কিনিছিল, সেই লটাৰী টিকটটোৱে সলাই দিলে ব্যক্তিজনৰ ভাগ্য। ব্যক্তিজনৰ নাম সদানন্দন। পেছাত তেওঁ এজন চিত্ৰকৰ। চিত্ৰশিল্পী সদানন্দনে লটাৰী টিকট কিনি ১২ কোটি টকা পাবলৈ সক্ষম হয়। সদানন্দনে কয় যে সেইদিনা তেওঁ মাংসৰ দোকানলৈ মাংস কিনিবলৈ গৈছিল। ৫০০ টকাৰ খুচুৰা কৰিবৰ বাবেহে তেওঁ ওচৰতে লটাৰী টিকট বিক্ৰী কৰি থকা এজন বিক্ৰেতাৰ পৰা এটা লটাৰী টিকট ক্ৰয় কৰে। সেই টিকটটোৱে সলাই দিলে তেওঁৰ ভাগ্য। পিছবেলালে খবৰ আহে যে সদানন্দনে লটাৰী খেলখনৰ প্ৰথম পুৰস্কাৰ ১২ কোটি টকা পাবলৈ সক্ষম হৈছে। এই খবৰ শুনি সদানন্দনৰ পৰিয়ালটোত আনন্দৰ বন্যা বয়। ইয়াৰ পূৰ্বে সদানন্দনে কেইবাবাৰো লটাৰী টিকট ক্ৰয় কৰিছিল কিন্তু কোনো এবাৰেই তেওঁ জয়ী হোৱা নাছিল। এইবাৰ তেওঁ অনিচ্ছাস্বত্বেও ল'ব লগা টিকটটোৱেহে তেওঁৰ জীৱনলৈ সুখ কঢ়িয়াই আনিলে। তেওঁ বিশ্বাসেই কৰিব পৰা নাছিল যে কেৱল ৫০০ টকা খুচুৰা কৰিবৰ বাবে মন নথকা স্বত্বেও কিনিব লগা হোৱা লটাৰী টিকটটোৱে তেওঁৰ ভাগ্যৰ দশা সলনি কৰি পেলাব। সদানন্দন আৰু তেওঁৰ পৰিয়াল তেনেই এটা সৰু ঘৰত বাস কৰে। একপ্ৰকাৰ দৰিদ্ৰ জীৱন কটাইছিল পৰিয়ালটোৱে। লটাৰীত পোৱা টকাৰে এটা সুন্দৰ ঘৰ নিৰ্মাণ কৰাৰ সপোন দেখিছে সদানন্দনে। তেওঁৰ কিছুমান ধাৰো আছে, সেই ধাৰো তেওঁ সোনকালে পৰিশোধ কৰাৰ কথা ভাবিছে আৰু লটাৰীত পোৱা ধনেৰে সন্তানৰ ভৱিষ্যৎ সুৰক্ষিত কৰাৰ কথা ভাবিছে সদানন্দনে। এই ঘটনা কেৰালাৰ তিৰুৱন্তপুৰমৰ। আৰু পঢ়কঃ ‘মুছলমান বাবেই মোক মন্ত্ৰী পদৰ পৰা বাহিৰ কৰিলে’-অভিযোগত তোলপাৰ ৰাজনৈতিক মহল