৬০ লাখ চাকৰিৰ সাঁথৰ

ডিজিটেল ডেস্ক: দেশৰ চাকৰি প্ৰত্যাশী যুৱক-যুৱতীসকললৈ এক আশাৰ খবৰ৷ বাজেট ভাষণত কেন্দ্ৰীয় বিত্তমন্ত্ৰী নিৰ্মলা সীতাৰমণে দেশত ৬০ লাখ নতুন নিযুক্তি দিয়া হ’ব বুলি ঘোষণা কৰাৰ দুদিন পাছতে আজি ৰাজ্যসভাত কৰ্মচাৰী ৰাজ্যিক মন্ত্ৰী জিতেন্দ্ৰ সিঙে সদৰি কৰে এক তথ্য৷ কেন্দ্ৰীয় ৰাজ্যিক মন্ত্ৰীগৰাকীৰ তথ্য অনুসৰি, ২০২০ চনৰ ১ মাৰ্চ পৰ্যন্ত ভাৰত চৰকাৰৰ অধীনস্থ বিভাগসমূহত খালী হৈ আছে ৮.৭২ লাখ পদ৷ দেশৰ মুখ্য নিয়োগকাৰী সংস্থাবোৰে ২০১৮-১৯ বৰ্ষ আৰু ২০২০-২১ বৰ্ষত ২,৬৫,৪৬৮টা পদত নিযুক্তি সম্পন্ন কৰিছে। বৃহস্পতিবাৰে ৰাজ্যসভাত কৰ্মচাৰী ৰাজ্যিক মন্ত্ৰী জিতেন্দ্ৰ সিঙে দিয়া এক লিখিত উত্তৰ অনুসৰি ২০১৯ চনৰ ১ মাৰ্চলৈ ৯,১০,১৫৩টা খালী পদ আৰু ২০১৮ চনৰ ১ মাৰ্চলৈ ৬,৮৩,৮২৩টা পদ খালী হৈ আছে৷ দেশৰ তিনিটা মুখ্য নিয়োগকাৰী সংস্থা, কৰ্মচাৰী বাছনি আয়োগ (এছএছচি), কেন্দ্ৰীয় লোকসেৱা আয়োগ (ইউপিএছচি) আৰু ৰে’লৱে নিযুক্তি পৰিষদ (আৰআৰবি)এ ২০১৮-১৯ আৰু ২০২০-২১ বৰ্ষত ২,৬৫,৪৬৮ টা নিযুক্তি প্ৰদান কৰিছে বুলি উত্তৰত কোৱা হৈছে।