কামপুৰত ভয়ংকৰ দুৰ্ঘটনা; তীব্ৰবেগী ৰাজধানী এক্সপ্ৰেছৰ প্ৰচণ্ড খুন্দাত ৭ টা হাতীৰ কৰুণ মৃত্যু

ডিজিটেল ডেস্ক: কামপুৰ চাংজুৰাইত সংঘটিত হৈছে ভয়ংকৰ দুৰ্ঘটনা৷ তীব্ৰবেগী ৰে’লৰ খুন্দাত ৭ টা হাতীৰ কৰুণ মৃত্যু। ৰাজধানী এক্সপ্ৰেছৰ খুন্দাত মৃত্যু হৈছে হাতীকেইটাৰ। এই দুৰ্ঘটনাৰ ফলত লাইনচ্যুত হৈছে ৰে’লখনৰ ৫টাকৈ দবা। সৌভাগ্যক্ৰমে প্ৰাণ ৰক্ষা পৰে যাত্ৰীসকলৰ। নিশা ২.১৭ বজাত সংঘটিত হৈছে দুৰ্ঘটনাটো।

নগাঁৱৰ কামপুৰৰ চাংজুৰাইত নিশা এই শোকাৱহ দুৰ্ঘটনাটো সংঘটিত হৈছে। ল’ক’ পাইলটে জৰুৰীকালীন ব্ৰেক মাৰিছিল যদিও ট্ৰেইনখন ৰোৱাৰ পূৰ্বেই হাতীৰ জাকটো দুৰ্ঘটনাত পতিত হৈ মৃত্যুক সাৱটি লয়।

খাদ্যৰ সন্ধানত নিশা ওলাই আহিছিল হাতীকেইটা। দুৰ্ঘটনাৰ ফলত স্তব্ধ হৈ পৰিছে বহুকেইখন ৰে’ল। পুৱতি নিশালৈ দুৰ্ঘটনাস্থলীতে আবদ্ধ হৈ আছিল ৰে’ল যাত্ৰীসকল। অসুবিধাত পৰা যাত্ৰীৰ বাবে গুৱাহাটীৰ পৰা বিশেষ ৰে’লৰ ব্যৱস্থা গ্ৰহণ কৰে উত্তৰ-পূব সীমান্ত ৰে’লৱে’ই।

যাত্ৰীক উদ্ধাৰৰ বাবে ৰে’ল বিভাগে গ্ৰহণ কৰিছে বিশেষ ব্যৱস্থা। ৰে’ল বিভাগে মুকলি কৰে তিনিটাকৈ হেল্পলাইন নম্বৰ। নম্বৰকেইটা ০৩৬১-২৭৩১৬২১ / ২৭৩১৬২২ / ২৭৩১৬২৩।

মিজোৰামৰ চাইৰাঙৰ পৰা নতুন দিল্লী অভিমুখী আছিল ৰে’লখন। দুৰ্ঘটনাগ্ৰস্ত দবাকেইটা এৰি পুৱা ৬.১১ বজাত গুৱাহাটীলৈ ৰাওনা হয় ৰাজধানী এক্সপ্ৰেছখন। সৌভাগ্যক্ৰমে ৰক্ষা পৰে এটা হাতী পোৱালি। ঘটনাস্থলীত বন বিভাগৰ লোক উপস্থিত হৈ আহত হাতীটোৰ চিকিৎসাৰ ব্যৱস্থা কৰিছে ৷

উল্লেখ্য যে কামপুৰত দীৰ্ঘদিনে বৃদ্ধি পাই আহিছে হাতী-মানুহৰ সংঘাত৷ খাদ্যৰ সন্ধানত নিশা বনাঞ্চলৰ পৰা জনাঞ্চললৈ নামি আহিছিল বন্যহস্তীৰ জাক৷ কেইবছৰমান পূৰ্বে কামপুৰ পটিয়াপামতে ৰে’লৰ খুন্দাত মৃত্যু হৈছিল পাঁচটাকৈ বনৰীয়া হাতীৰ৷