ডিজিটেল ডেস্কঃ কৰ্মজীৱনত তেওঁ কেতিয়াও এদিনৰ বাবেও ছুটী লোৱা নাই। ৰ’দ, বৰষুণ, ধুমুহা অথবা শৰীৰ বেয়া হ’লেও তেওঁ কামলৈ গৈছে। তেওঁ অতি কম বয়সতে এটা ডিপাৰ্টমেণ্টেল ষ্টোৰত কাম কৰিবলৈ আৰম্ভ কৰিছিল। তেতিয়াৰে পৰা কেৱল কাম আৰু কাম।
তেওঁ তাত ৭৪ বছৰ ধৰি কাম কৰিছে। কিন্তু সাত দশকতকৈও অধিক সময়ৰ কেৰিয়াৰত তেওঁৰ নাম কেইবাটাও বিশেষ কাৰণত সমগ্ৰ বিশ্বতে 'ভাইৰেল' হৈ পৰিছে। তেওঁ কাম কৰা কোম্পানীটোৱে জনোৱা অনুসৰি ৯১ বছৰীয়া মেলবা মেবানে কামত যোগদান কৰাৰ পিছত এদিনো ছুটী লোৱা নাছিল।
আনকি তেওঁৰ দীঘলীয়া কেৰিয়াৰত তেওঁ প্ৰতিদিনে সঠিক সময়ত তেওঁৰ কাৰ্যালয়ত উপস্থিত হৈছিল। মেলবা ডিপাৰ্টমেণ্টেল ষ্টোৰত উপস্থিত হয় নিৰ্ধাৰিত সময় পুৱা ১০ বজাৰ প্ৰায় এঘণ্টা আগতে । মেলবাই ৯:১৫ বজাত কাৰ্যালয়ত উপস্থিত হোৱাৰ কেইটামান কাৰণো আছে। তেওঁ কয়, " গাড়ী খন আগতে পাৰ্ক কৰিবলৈ ঠাই পোৱাটো অতি গুৰুত্বপূৰ্ণ আছিল।"
তেওঁ ডিলাৰ্ডছ নামৰ এটা ডিপাৰ্টমেণ্টেল ষ্টোৰত কাম কৰিছিল। এই ডিপাৰ্টমেণ্ট ষ্টোৰটো আমেৰিকাৰ বিভিন্ন প্ৰদেশত যথেষ্ট বিখ্যাত। তেওঁ টেক্সাছৰ ডিলাৰ্ডছৰ এটা শাখাত কাম কৰিছিল। টেক্সাছৰ বাসিন্দা মেলবাই অৱসৰ লোৱাৰ দিনাকোম্পানীটোৰ শীৰ্ষ পদাধিকাৰসকলে কৈছিল "মেলবা আমাৰ এগৰাকী অতি পুৰণি কৰ্মচাৰী।
তেওঁ কেৱল ছুটী নোলোৱাই নহয়, দীৰ্ঘদিন ধৰি ডিলাৰ্ডছত এজন দক্ষ কৰ্মচাৰী হিচাপে কাম কৰিছিল। মেলবাই বহু কৰ্মচাৰীক কেনেদৰে কাম কৰিব লাগে শিকাইছে’’, মেলবাই প্ৰতিজন গ্ৰাহকৰ সৈতে ভাল ব্যৱহাৰ কৰিছিল। আনকি তেওঁৰ কথা শুনাটোও বহুতৰে বাবে এক বিশেষ অভিজ্ঞতা স্বৰূপ আছিল।
৯১ বছৰীয়া মেলবাই কৈছে যে কামলৈ যাওঁতে কেতিয়াও দৰমহাৰ বিষয়ে চিন্তা কৰিব নালাগে । কাম কৰাটোক এক আনন্দ হিচাবে গ্ৰহণ কৰিব লাগে।
